Lubhalwe ngu-Anita Dangazele
UJulius Malema ulahlwe yicala lokutholakala nesibhamu nezinhlamvu ngokungemthetho, ukubeka engozini izimpilo zabalandeli kanye nokuqhumisa isibhamu phambi kwabantu.
UMalema ubhekene nesigwebo ngoMasingana ka-2026 futhi uthi uzolidlulisela phambili icala, alibize ngelobandlululo kanti uthembise ukulwa kuze kube sekugcineni.
Umholi we-EFF uJulius Malema utholwe enamacala kuwo wonke amacala akhe athinta isibhamu, ngemuva kweminyaka eyisikhombisa kugqigqwa leli cala.
Lokhu kwenzeka embuthanweni wokugubha iminyaka emihlanu kwasungulwa iqembu eMdantsane ngo-2018, lapho uMalema aqoshwa khona edubula emoyeni ngesikhathi esesiteji eSisa Dukashe Stadium.
NgoLwesine, iNkantolo yeMantshi yase-East London imlahle ngecala lokutholakala nesibhamu okungekho emthethweni, ukutholakala nezinhlamvu okungekho emthethweni, ukubeka izimpilo zabantu engozini kanye nokuqhumisa isibhamu phambi kwabantu.
Owayengunogada wakhe, u-Adriaan Snyman, naye owayebhekene namacala afanayo akatholakalanga enecala.
UMalema wathi isibhamu kwakuyithoyizi, kodwa umbuso wabiza ofakazi abangu-19, okuhlanganisa nongoti bezibhamu, ukufakazela ukuthi kwakuyisibhamu sangempela.
IMantshi uTwanet Olivier ithe uMalema wehlulekile ukuphendula imibuzo futhi ubehlale enikeza izimpendulo okungezona. Uthe ukusola “umoya ongcwele” ngokumxhumanisa nesibhamu akuzange kumsize ngalutho.
Ngaphandle kwenkantolo, uMalema utshele abalandeli abebejabule ukuthi ukuya ejele noma ukushona kuyibheji lokuhlonishwa komzabalazo. Uthe i-EFF izodlulisa icala, ngisho naseNkantolo yoMthethosisekelo uma kunesidingo.
Ukugwetshwa kuzokwenziwa ngomhlaka-23 kuMasingana ka-2026, futhi ibheyili yeluliwe kuze kube yileso sikhathi.
UMalema uphinde wasola imantshi ngokucwasa nokuchema ne-AfriForum.
Esithombeni esingenhla: Umholi we-EFF uJulius Malema uphuma eNkantolo yeMantshi yase-East London ngemuva kokulahlwa yicala.
Umthombo wesithombe: Economic Freedom Fighters