UMalema ufuna ukubambezela ukhetho, kodwa imiphakathi ayikwazi ukulinda kuze kuphume amakhansela angasebenzi kahle

Lungani Zungu

Umholi we-Economic Freedom Fighters (EFF) uJulius Malema ufuna ukhetho luhlehliselwe unyaka wezi-2024 ngenxa ye-Covid-19.

Isiphakamiso sakhe, nokho, senqatshwe ngokuphelele yimiphakathi efuna ukuvotela osodolobha abasha namakhansela kulo nyaka.

UMnuz Thabani Mkhungo, obehola uchungechunge lwemashi enesiphithiphithi eyolwa nekhansela lakuWadi 80 uMthokozisi Nojiyeza eMlazi KwaZulu-Natali, uphikisana nesiphakamiso sikaMalema.

“Asikwazi ukuholwa yikhansela lewadi elingawazi kahle umsebenzi eminyakeni emithathu ezayo. Sifuna ukukhetha umuntu esimfunayo ku-ANC ozosimela okhethweni,” kusho uMkhungo.

“Ikhansela uNojiyeza lenze umonakalo owanele ewadini yethu. Kumele ahambe kulo nyaka!”

Izikole namanye amabhizinisi endawo avale isonto lonke njengoba uMkhungo nesixuku sakhe bebevuke umbhejazane benxusa ikhansela ukuba lehle esikhundleni.

Bamsola ngokwehluleka ukuphatha kahle le wadi.

Ekuqaleni konyaka odlule, abahlali base-Cato Crest, entshonalanga yeTheku bashisa izimoto zikamasipala ngesikhathi zigijimela phezulu zicela ikhansela lewadi uMkhipheni Ngiba ukuba ehle esikhundleni.

UThami Mseleku obehola leyo mashi uthe, “UMalema angazihlukanisa ne-EFF yakhe okhethweni. Asikwazi ukuhlala naleli khansela usuku olulodwa, cabanga iminyaka emithathu yonke. Uhluleke kabi ngokuhola iwadi. Sifuna ahambe.”

UMseleku uthe, esikhundleni sokuhlehlisa ukhetho amaqembu ezepolitiki kumele abheke ezinye izindlela.

“Singafunda emazweni afana noMelika futhi sisebenzise uhlelo lokuthumela ama-imeyili kwabanye kanye nokuvotela abanye mathupha. Kunendlela esinganciphisa ngayo ukusabalala kwe-Covid-19 sibe siqhubeka nokhetho.”

Amanye amaqembu, okubalwa uHerman Mashaba ongumholi we-ActionSA, usichithile esidlangalaleni lesi siphakamiso.

UMalema uthe, izwe lingabamba ukhetho lukazwelonke olulindeleke ngowezi-2024 kanye nokhetho lohulumeni basekhaya, ngesikhathi esisodwa.

Ikhomishini Yokhetho Ezimele enikwe umsebenzi wokuphatha ukhetho ithe isakhuluma namaqembu ezepolitiki.

Isithombe: @sapeople