Umakhalekhukhwini wesisulu uholele amaphoyisa ekutholeni umdlwenguli omkhulu

Everson Luhanga & Arthur Greene

Inhlanhla kaGift Mkhwanazi yagcina iphele ngomhla ziyi-11 kuZibandlela kowezi-2019. Cishe iminyaka eyisithupha, indoda eneminyaka engama-33 ubudala yase-Tembisa kusolwa ukuthi yadlwengula futhi yahlasela okungenani abesifazane abangama-33.

Yileyo ndlela uMkhwanazi azithola esejele ebhekene namacala obugebengu ayi-149, elokuzama ukubulala, elokubamba inkunzi ngesihluku, ukuthumba nokutholakala nesibhamu. (Sicela ubheke i- “Beast of Tembisa“.

Ngowezi-2019, umenzi wobugebengu kuthiwa wadlwengula owesifazane wamphuca nomakhalekhukhwini wakhe, njengoba enza kwesinye nesinye sezigameko zokudlwengula azenzayo.

Owesifazane wabe esebika lobu bugebengu esiteshini samaphoyisa e-Tembisa South, nokudale ukuthi kube nomkhankaso obanzi wokubamba umdlwenguli wase-Tembisa.

Amaphoyisa aqala ngokuthungatha umakhalekhukhwini owebiwe, athola inombolo yalelo cingo elithile.

Abaseshi babe sebeyolanda irejista kubahlinzeki bezinsizakalo zenethiwekhi ukuze bavikele amarekhodi wezincingo.

Kuleli qophelo, baqale inqubo ende yokushayela zonke izinombolo ezivele kaningi ohlwini lwezincingo ezingenayo neziphumayo.

Ekugcineni, owesifazane walubamba ucingo.

Abaseshi bahlela ukuhlangana nalowo wesifazane, wabazisa ukuthi umuntu ophethe umakhalekhukhwini owebiwe yisoka lakhe.

Lo mlisa wabizelwa esiteshini samaphoyisa ngokushesha wabuzwa ukuthi kwenzeka kanjani ukuba alubambe ucingo.

Uveze ukuthi umngani wakhe omkhulu, uGift Mkhwanazi, nguye owamnikeza ucingo mahhala.

Lo mlisa ube eseboshwa, esolwa ngokuba nempahla eyebiwe.

Ngokuhamba kwesikhathi ngalabo busuku, abaphenyi bayalele lo mlisa ukuba ashayele uMkhwanazi ucingo azenze sengathi ufuna ukuyophuza nomngani wakhe.

Babe sebephuma ngemoto baya endaweni yomhlangano, indawo yokucima ukoma ese-Ebony Park, lapho abafica khona uMkhwanazi engazelele elinde ngaphandle ukuze kufike umngani wakhe.

Amaphoyisa ashayele inombolo kamsolwa. Ngesikhathi ephendula, amaphoyisa azungeza indawo angena ambopha.

Ngemuva kophenyo, abaseshi bathole ukuthi uMkhwanazi uxhunyaniswe nezinye izigameko ezifanayo.

Ngokushesha babona ukuthi indoda ababeyiphethe ingaba ngomunye wabadlwenguli abayingozi emlandweni waseNingizimu Afrika.

UGift Mkhwanazi usalinde ukuqulwa kwecala lokudlwengulwa kwabesifazane abangama-33.

Picture source: @SAPoliceService

Izihloko zakamuva