Philani Mzila
UMakhadzi uziqhelelanisile engomeni ethi “Woza Summer” kaLimpopo Boy.
UMakhadzi, ogama lakhe langempela uNdivhudzannyi Ralivhona, utshele abakwa-Scrolla.Africa ukuthi akazi lutho ngale ngoma.
“Angazi lutho ngale ngoma. Angazi ukuthi kungani bangibala njengomunye wabaqambi bayo,” esho.
UMakhadzi, owaduma ngengoma ethi-Tshanda Vhuya no“Matorokisi ” utshele abakwa-Scrolla.Africa ukuthi akazi ukuthi kungani efakwe ohlwini lwabaqambi.
“Angikaze ngenze lutho kule ngoma,” esho.
I-“Woza Summer,” ekaRobert Thoka, owaziwa ngelikaLimpopo Boy, ikhishwe ngoLwesihlanu.
Le ngoma isenkingeni yombango phakathi kukaLimpopo Boy nomlingani wakhe uBlessing Khumalo, owaziwa ngelikaSikorobho.
Umbango uqale ngesikhathi uSikorobho ezwa ukuthi uLimpopo Boy ubhalise le ngoma njengengoma yakhe, lapho isivumelwano sabo sokuqala bekungukuthi bazoyikhipha ndawonye le ngoma.
“Bekuphazamisa okwenziwe uLimpopo Boy,” kusho uSikorobho.
Ngokusho kukaSikorobho, le ngoma ikhishwe ngaphansi kwe-Open Mic kanti iqukethe u-Queen Lolly no-Dj AirBurn Sounds.
USikorobho uthe akalwi noLimpopo Boy kodwa wengeza wathi: “Ungikhaphele kule ngoma. Nami ngishiye ifulethi lakhe ngoba akwenzile bekungekuhle neze. Wayenomuhawu futhi angikwazi ukuhlanganyela igumbi elilodwa nomuntu osayina amadili engangitshelanga. Ngelinye ilanga uzongidinga.”
ULimpopo Boy ukuqinisekisile ukuthi uyikhiphe yedwa le ngoma wabe esekhwela edilika kuSikorobho.
“Ungusomathuba. Ungisebenzisile. Leyo ngoma ngeyami futhi kumele ayeke ukungikhuluma kabi,” esho.
Imenenja ye-Open Mic uBrandon Maseko ukuphikile ukuthi ikhishwe ngaphansi kwe-stable sakhe.
“Bengimsiza kuphela ngoba udansela uMakhadzi. Ingoma ikhishwa ngokuzimela. Angikwazi ukukutshela igama le-stable,” esho.
.
