Philani Mzila
Umculi odabuka e-Limpopo sekungunyaka wesibili kulandelana eshiywa ngaphandle kuma-South African Music Awards.
UMakhadzi ogama lakhe langempela nguNdivhudzannyi Ralivhona, ubhake ku-Twitter ngoLwesithathu ebusuku ngemuva nje kokumenyezelwa kwabaqokiwe wazwakalisa ukudumala kwakhe kuma-SAMA.
Izingoma zakhe ezishisa izikhotha i-Tshanda Vhuya ne-Matorokosi ayikhethwanga yithimba lamajaji njengoma efanele ukuhlonishwa.
Ubhale wathi, “Ngiwahambisile amafomu kuma-SAMA, mhlawumbe angizange ngihlangabezane nezidingo zawo.”
Ama-SAMA amemezele abaqokiwe bangowezi-2021 ngoLwesithathu ebusuku kanti uKabza De Small uhamba phambili ekuqokweni.
Ekhuluma ne-Scrolla.Africa, uMakhadzi uthe uthukutheliswa ukwenzelwa phansi.
“Ngathula nyakenye ngesikhathi beqamba amanga bethi ngiwahambise amafomu ami sekwedlule isikhathi. Abahleli ngokwabo bayazi ukuthi ngawahambisa amafomu kusenesikhathi.”
Uze ungabaza nokukhetha kwamajaji, futhi usola ubandlululo.
“Sengiqala ukucabanga ukuthi angiqokwa ngoba ngingowesifazane wase-Venda.”
“Kubuhlungu ukungaziswa ekhaya ngawo wonke umsebenzi owenzayo emsebenzini wakho wezandla nesikhathi osichitha estudiyo uqinisekisa ukuthi unikeza abantu umculo ohamba phambili,” kuqhuba yena.
UMakhadzi ufunge wagomela ukuthi ngeke ayeke ukungenela lezi zindondo aze awine.
“Ukube le miklomelo ibingahloselwe abantu engibabiza ngabalandeli bami ngabe ngiyekile ukuthumela ngonyaka odlule.”
“Ngizoqhubeka nokuthumela kuze kube ngiyabawinela abalandeli bami nabantu bami e-Venda,” esho.
Abanye abaculi abasale ngaphandle kuma-SAMA kubalwa abaculi bakaMaskandi abathola izindondo uKhuzani Mpungose kanye noMthandeni “Igcokama Elisha” Manqele.
Umphathi wama-SAMA uLesley Mofokeng uthe: “Ama-SAMA awawona umncintiswano wokuduma. Uma iqembu lethu elihloniphekile lamajaji likhetha abangenelayo abacabangi impumelelo yezentengiselwano, konke okubhekwayo ukwahlulelwa ngobuhle nobuciko babo. Siyaziqhenya ngezinga labaqokelwe i-SAMA27.”