Philani Mzila
Umethuli wohlelo i-Rea Tsotella u-Bishop Israel Makamu, olungisa izinkinga zabantu kumabonakude akumuhambeli kahle njengoba ebhekene nezinkinga zempilo yakhe.
Ngaphezu kwazo zonke izinkinga zakhe anazo, usomabhizinisi owaziwa i-Scrolla.Africa uthi uMakamu uyahluleka ukumkhokhela isamba semali eyizi-R280,000 ayiboleka kuye ngowezi-2016 ukuze avuselele isakhiwo sebandla lakhe.
Ngokwesitatimende esithunyelwe ku-WhatsApp, uMakamu waboleka le mali wathi uzoyikhokha emuva kwezinyanga ezimbili.
Esitatimendeni lo mlisa usola uMakamu ngokumziba kumakhalekhukhwini futhi wambiza ngomuntu ongenanhliziyo.
“Kuningi okuseza kuwe. Uxabane nomuntu ongafanele. Ngikusizile njengomfowethu. Awunamahloni,” kusho lo mbhalo.
“Ngakutshela ngenkathi ngihlangana nawe ukuthi akumele uqale into ongeke uyiqede,” kufundeka kanje.
Lo somabhizinisi uthe uzwela unkosikazi kaMakamu.
“Engikufunayo kuwe yimali yami ongithembise ukuthi uzongibuyisela yona,” kusho yena.
“Unkosikazi wakho uyazi naye njengoba wayekhona e-Sasfin Bank ngesikhathi ngikunikeza imali.”
Lo somabhizinisi wenqabile ukuphawula, wathi lolu daba luphakathi kwakhe noMakamu ngaphambi kokuthi avale ucingo.
Imizamo ye-Scrolla.Africa yokuthola ukuphawula kuMakamu ayiphumelelanga njengoba umakhalekhukhwini wakhe ubucishiwe.