Lubhalwe nguRorisang Modiba
UMacG ubhekene nengwadla ngemuva kokuphawula ngokuhlukana kukaMinnie Dlamini nesoka lakhe kwakamuva.
Isiteshi sikamabonakude iMoja Love nabasebenzisi bezinkundla zokuxhumana bamgxekile ngokusabalalisa imibono elimazayo ngabantu besifazane.
Umsakazi we-podcast odumile uMacgyver “MacG” Mukwevho usenkingeni futhi, kulokhu ngenxa yokuphawula ngomethuli kamabonakude uMinnie Dlamini.
Esiqeshini sakamuva sohlelo lwakhe i-Podcast and Chill, uMacG ukhulume ngokuhlukana kukaDlamini nodokotela ohlinzayo uDkt Brian Monaisa. Laba bobabili baqede ubudlelwano babo ekuqaleni kwale nyanga.
UDkt Monaisa ukuqinisekisile lokhu kuhlukana ezinkundleni zokuxhumana, wathi kungenxa yezinye izizathu hhayi ngenxa yokuphinga. Uqhube wathi usamhlonipha uDlamini.
Kodwa amazwi kaMacG athukuthelisa abaningi. Ubuze ukuthi kungani uDlamini engakwazi ukugcina indoda wathi , “Kufanele kube khona okungalungile ngaye; mhlawumbe ingaphansi lakhe liyanuka noma kukhona okuthile okungahambi kahle.”
Inkundla yezokuxhumana iqhume ngentukuthelo, futhi abantu abaningi bafuna ukuthi i-podcast yakhe ihoxiswe.
IMoja Love nayo ingenelele, uNonzwakazi Cekete okhulumela iMoja Love uthe: “Le nkulumo isakaza imibono elimazayo ngabantu besifazane.Kufanele engabe bakhuthaza abantu hhayi babacindezele.
UDkt Monaisa uphinde wakhuluma, wathi abaphathi be-podcast babonakala benenkinga nabesifazane abaphumelelayo.
Akukhona okokuqala uMacG ebhekana nenkinga ngamazwi akhe.
Ngonyaka odlule, umculi uNkosazana Daughter wammangalela ngo-R13-million ngemuva kokukhuluma okungelona iqiniso ngoyise wengane yakhe.
Umlingisikazi uRosie Motene naye wammangalela ngo-R1-million ngenxa yamazwi ayinhlamba.
Osesithombeni esingenhla: UMinnie Dlamini.
Umthombo wesithombe: @minniedlamini