Sizwe Sibiya
Umrepha wase-Canada nodume umhlaba wonke uDrake uhlangane nentanga yakhe kumrepha wase-South Korea uLisa, omkhiphe endaweni yokuqala ku-American Music Charts.
Ingoma yakhe ayicula yedwa ethi-“Lalisa” yehlise i-“Way 2 Sexy” kaDrake, ehlanganisa umrepha uKamva noYoung Thug, yayibeka kunombolo yesibili ngemuva kokuthi ihambe phambili amasonto.
Lo mculi oneminyaka engama-24 wazalelwa e-Thailand wathuthela e-South Korea lapho aqala khona umsebenzi wakhe wokuba yilungu leqembu lamantombazane elidumile, i-Blackpink.
Wanyukela esigabeni esiphezulu saseMelika ngemuva kokukhipha izingoma ezimbili ezikwi-albhamu yakhe ethi-Lalisa, ekuqaleni kwale nyanga, nengoma ethi-“Money” nethi-“Lalisa”.
Ube ngumculi wokuqala we-K-Pop wase-South Korea ukuthatha indawo yokuqala kumashadi omculo waseMelika, ngokusho kwe-Forbes.
E-South Korea, lapho okuzinze khona uLisa, le albhamu imenze waba ngumculi wesifazane wokuqala ukuthengisa amakhophi ayizi-736,000 esontweni lokuqala lokukhishwa kwayo.
Ku-YouTube, ividiyo yomculo ka-“Lalisa” ibukwe izikhathi ezingaphezu kwezigidi ezingama-73 emahoreni angama-24. Lokhu kumbeka kunombolo yesithupha ohlwini lwabaphezulu abayishumi abanamavidiyo omculo abukwa kakhulu kunabo bonke kwiplatifomu ngokusho kokushicilelwa.
Yize ukusebenza kwakhe yedwa kuqale kancane, uLisa, ogama lakhe langampela nguLalisa Manobal, akazange amemezele ukuthi ushiya i-Blackpink.
Umthombo wevidiyo: i-YouTube