Lubhalwe nguDylan Bettencourt
I-Atlas Lions okuyi-Morocco iqophe umlando ngokuba iqembu lokuqala lase-Afrika ukungena kowandulela owamanqamu eNdebeni yoMhlaba likhipha ompetha base-Europe kulandelana.
Abadlali baseNyakatho ne-Afrika baqale uhambo lwabo oluyisimangaliso ngokuhlula i-Belgium okuyiqembu elibekwe endaweni yesibili emhlabeni ngesikhathi semidlalo yamaqoqo ngaphambi kokudlulela emzuliswaneni womkhumulajezi okokuqala kusukela ngo-1986.
Ngemuva kwalokho i-Morocco ibhekane nomsebenzi onzima ngesikhathi ibhekene ne-Spain, kodwa yakwazi ukuphumelela sekukhahlelwa amaphenathi.
Ngemuva kwalokho babhekane nelinye izwe lamakoloni i-Portugal emdlalweni obunzima kakhulu.
I-Morocco iwine lo mdlalo ngegoli elilodwa eqandeni futhi yaba izwe lokuqala lase-Afrika ukungena kowandulela amanqamu eNdebeni yoMhlaba.
Manje njengoba i-Morocco isidlule amaqembu amaningi sekumele ibhekane ne-France okuyizwe elalikade libalawula.
Futhi lokho kuzokwenza umdlalo wabo ube nzima kakhulu. Akuyona kuphela i-France okumele bazikhathaze ngayo njengoba kuqubuke ukushuba kwesimo sezepolitiki ngaphambi komdlalo.
Amaphoyisa e-France abhekane nabalandeli be-Morocco ngesikhathi bebungaza ukuhlula kwabo i-Portugal emigwaqeni yase-Paris ngoMgqibelo ebusuku.
Lokhu kungqubuzana kuza ngemuva kweminyaka engamashumi amabili yokungezwani kwezombusazwe phakathi kwalezi zizwe zombili, kanti kuleli sonto usopolitiki wase-France u-Éric Zemmour ugxeke izakhamuzi zase-France ngosiko lase-Morocco lokubungaza ukunqoba kwe-Atlas Lions.
Umlando phakathi kwe-France ne-Morocco usuka kude kanti abanye abadlali be-Morocco abase-Qatar futhibazalelwa bakhulela e-France.
Kodwa-ke, uma womabili amaqembu esengena enkundleni kumele bakhohlwe konke ukungezwani kwezepolitiki futhi i-Morocco izolwela indawo kowamanqamu eNdebe yoMhlaba.
Ngaphambi kokuthi kuqale umdlalo e-Qatar, ithuba leqembu lase-Afrika lokudlala kowamanqamu alibonakali kahle.
Kodwa i-France ithwele kanzima emahlombe ayo njengoba ne-Morocco izobe ilwela ukuziveza.
I-Morocco izobuyela ekhaya njengamaqhawe kungakhathalekile ukuthi umphumela uthini namhlanje ebusuku, kodwa ukuhlulwa kwe-France kuzodala ukucasuka kanye nentukuthelo ezweni lonke.
Umdlalo wesibili kowandulela owamanqamu uzoqala ngehora lesishiyagalolunye namhlanje.
Isithombe esingenhla ngese-Morocco ibungaza e-Qatar
Umthombo wesithombe: @FifaWorldCup