Menzi Magubane
Indlela yeBafana Bafana ebheke e-Qatar yinhle kakhulu kunakuqala, ngemuva kokunqoba kwayo idlala ne-Zimbabwe ngegoli elilodwa eqandeni kumdlalo ka-Group G wokuhlungela indebe yomhlaba ye-FIFA yonyaka wezi-2022 enkundleni ye-FNB ngoLwesine ebusuku.
Umdlali weqembu le-Supersport United uTebogo Mokoena uphinde walifaka epalini ngemizuzu engama-26. Bekuyigoli lakhe lesibili kule midlalo yokuhlunga.
UKeagan Dolly obengumdlali oqavile ube nesandla ekunqobeni kweBafana. Ufake isigxivizo ngokubuya kwakhe kuBafana ngenkathi esiza kakhulu uMokoena ofake phakathi ibhola ebeliphaswe uDolly ngokukhululeka.
Manje inselelo elandelayo kuBafana eyokubhekana ne-Ghana ngeSonto.
Lona kuzobe kuwumdlalo wokugcina waleli qoqo ngaphambi kwesigaba sokugcina semidlalo yokuhlunga. IBafana izobhekisa amabombo e-Ghana ngoLwesihlanu. Baya lapho basaqhwakele ku-Group G ngamaphuzu ayi-13, njengoba isele ngamaphuzu amathathu endaweni yesibili i-Ghana.
I-Ghana ibe nesihluku esikhulu ngesikhathi idlala ngokulingana ngo 1-1 ne-Ethiopia, idlalela ekhaya enkundleni ye-Orlando, e-Soweto.
Iphuzu ngeSonto lizokwanela ukubona iBafana idlula, kanti i-Ghana izodinga ukuwina okungenani amagoli amathathu ngaphandle kokungenelwa igoli ukuze ibe nethuba lokudlulela phambili.
Ngokumazi umqeqeshi weBafana Bafana uHugo Broos, ngeke ajabule ngephuzu noma abone iqembu lakhe lingenelwa yigoli.
Uzophusha abafana bakhe ukuthi bawathathe womathathu amaphuzu bawine iqoqo ngaphandle kokuhlulwa.
Yize ingcindezi izobe ikwi-Ghana ngeSonto, kodwa iBafana akumele iphonse ithawula. Ama-Black Stars angabazwisa ubuhlungu obukhulu uma ethathwa kancane.
Umdlalo wabo ubuse-Soweto ngoLwesine ebusuku njengoba inkundla yesizwe, i-Bahir Da e-Addis Ababa ivalwe yi-CAF ngoba ingaphephile.
Emdlalweni okaputeni bobabili bala maqembu bebembane ngezihluthu. Umgadli we-Black Star, u-Andre Ayew, ubeke ezakhe phambili ngemizuzu engama-22, kwathi uGatane Kebede walinganisela i-Ethiopia ngemizuzu engama-72.