Dylan Bettencourt
Umqeqeshi we-Egypt uCarlos Queiroz, uthe ngesikhathi uSamuel Eto’o eqhathanisa umdlalo we-Africa Cup of Nations Semifinal ne-Cameroon kwathumela umyalezo omubi kakhulu.
Kuqhamuke ividiyo yalowo owayengumdlali webhola, manje osenguMengameli we-Cameroon Football Federation, eqhathanisa umdlalo owandulela owamanqamu we-Afcon ngoLwesine phakathi kwe-Cameroon ne-Egypt njengempi eyenzeka izikhathi eziningi.
“Zilungiseleleni ngoba lokhu kuzoba impi,” kusho u-Eto’o.
Amazwi ka-Eto’o awehlanga kahle ku-Queiroz ngaphambi komdlalo.
“Bekungamele aphawule ngalendlela,” kusho umqeqeshi oneminyaka engu-68.
“Kuthumela umyalezo omubi kakhulu kubantu base-Cameroon. Lesi simemezelo sikhombise ukuthi akafundanga lutho ngenkathi esebholeni elikhokhelwayo.”
Uthe ibhola alihlangene nempi.
“Ibhola limayelana nokubungaza, nenjabulo,” kusho umphathi wase-Portugal.
Ukhumbuze u-Eto’o ukuthi kushone abantu abayisishiyagalombili ngesikhathi kunyathelana abantu enkundleni yezemidlalo i-Olembe ezinsukwini ezimbalwa ezedlule, kanti ukusetshenziswa kwegama elithi “impi” akunambitheki.
U-Eto’o ubize umdlalo webhola ngempi ngesikhathi esibi lapho isifunda sase-Cameroon esiseNingizimu nentshonalanga sisathinteke kakhulu ngenxa yezingxabano.
Kusukela ngonyaka ka-2017 lesi sifunda sihlaselwe impi yombango njengoba amasosha ezama ukwakha i-Breakaway state ebizwa ngokuthi Ama-banzonia. Bangaphezu kwesigidi abantu abaphoqeleke ukuba babaleke emakhaya abo.
UQueiroz uthe yena nethimba lakhe bazohlinzeka ngempendulo efanele kumazwi ashiwo u-Eto’o.
“Sizophendula ngebhola elihle kakhulu, isimo sengqondo esihle kakhulu, kanye nebhola elisezingeni eliphezulu ngoba ilokhu abantu abakulindele kithi,” esho.
Umdlalo owandulela owamanqamu we-Afcon wesibili uzoba ngoLwesine ngo-9 ebusuku. Ozonqoba uzobhekana ne-Senegal kowamanqamu ngeSonto.
Umthombo wesithombe: @SportyAfrica