Lubhalwe nguZukile Majova
Umhleli wezepolitiki
OwayenguNobhala Jikelele we-ANC u-Ace Magashule akanalo iqembu angaphansi kwalo futhi ukulungele ukungena noma ikuphi.
UMagashule njengamanje akwaziwa noma uzojoyina umholi we-UDM uBantu Holomisa noma i-EFF kaJulius Malema mhlawumbe futhi angasungula neqembu lakhe.
Izolo ebusuku ubedla isidlo sasebusuku noShukela Thwala, onguMengameli we-Team Sugar South Africa (TSSA) ophinde abe iPhini leMeya yase-Newcastle.
I-TSSA ibambisene ne-IFP ne-DA.
NgoMasingana, i-Scrolla.Africa sabika ngendlela i-TSSA eyakhipha ngayo ama-microwave nezinye izinto ezisebenza ngogesi ukuze iwine ukhetho lokuchibiyela. [ https://scrolla.africa/new-kzn-party-out-to-win-buy-election/ ]
UThwala ufake ividiyo ehlezi noMagashule, ngokusobala uqinisekise inkulumo kaMagashule yokuthi ukhuluma nenqwaba yezinhlaka zepolitiki ezimfunayo ukuba ajoyine amaqembu azo.
UMagashule uyichithile imibiko yangempelasonto ethi unqabe ukujoyina uMalema ne-EFF wathi usafuna ukucabanga kahle ngaphambi kokuthatha isinqumo sokugcina.
Lowo owayengunobhala-jikelele we-ANC waxoshwa eqenjini ngokuzama ukumisa uMengameli Cyril Ramaphosa ngaphandle kwegunya lekomidi eliphezulu leqembu.
Ngesonto eledlule uMalema osanda kwamukela lowo owayeyisikhulumi sikaJacob Zuma ngesikhathi esanguMengameli, uJimmy Manyi uthe ubelindele ukuthi uMagashule ajoyine i-EFF.
“Ngikhuluma naye futhi sisezingeni eliphezulu lezingxoxo. Kwipolitiki kubaluleke kakhulu ukuthi ukhulume nawo wonke umuntu.
“Ngakho-ke, ngikhuluma naye futhi uma ngithi ngikhuluma naye ngiqonde ukuthi i-EFF imatasatasa no-Ace Magashule,” kusho uMalema.
Ngesikhathi ebona ividiyo kaMagashule edla nomholi we-TSSA, uNobhala Jikelele we-ANC uFikile Mbalula uthe ngeke asihloniphe isicelo sikaMagashule sokuhlangana nobuholi be-ANC.
“Kungani kufanele ngihlangane nomuntu owakha itulo lokuwisa i-ANC kusukela ngosuku lokuqala ehhovisi?
“Njengamanje ubungaza ukuhlulwa kwe-ANC,” kusho uMbalula ngoLwesine ngemuva kokuba i-ANC ihlulwe okhethweni lokuchibiyela e-Newcastle.
Amazwibela: U-Ace Magashule ehleli nabaholi beqembu lezepolitiki i-Team Sugar SA ngemuva kokunqoba i-ANC okhethweni lokuchibiyela
Umthombo wesithombe: I-Twitter