Ukulahlekelwa umdlali wasesiswini kuwukulahlekelwa okukhulu

Timmy T Maranda

Ukulahlekelwa ngumdlali wabo wasesiswini, uMamello ‘Jabu’ Makhabane, kuletha inselelo enkulu kwiJVW Girls Football Club.

“Kulimaza noma yiliphi iqembu ukulahlekelwa yinoma yimuphi umdlali, ikakhulukazi umdlali osezingeni likaMamello Makhabane ngamava akhe aphesheya,” kusho umqeqeshi uCiara Picco etshela i-Scrolla.Africa.

“Kodwa sizomthola ozobamba indawo yakhe aze alulame.”

Lesi sihlabani seBanyana Banyana esesidlale imidlalo engaphezu kwekhulu, sidlale yonke imidlalo yeJVW Girls Football kuze kube manje kule sizini. UMamello useshaye amagoli amabili emdlalweni wakhe neqembu.

Ngokwemibiko ekwi-Twitter, uMamello waphuka isihlakala emdlalweni bebhekene ne-UWC. Waphuthunyiswa esibhedlela njengoba wayesezinhlungwini ezinzima.

IJVW Girls Football club ihlulwe ngo 3-1 yi-University of the Western Cape e-Hollywoodbets Super League ngoMgqibelo e-UWC Stadium.

“Leli yithuba lokuthi abantu abasebasha basukume bavale isikhala,” kusho uPicco.

“Siyabonga ukuthi sinabadlali abaningi abangafika bagcwalise lezo zicathulo ezinkulu.”

Lo mqeqeshi ukuqinisekisile ukuthi uJabu wahlinzwa esihlakaleni eKapa kanti uzophuma esibhedlela maduze.

UPicco wengeze ngokuthi akakabi naso isiqiniseko ngokuthi uzokwazi nini ukudlala njengoba kulindeleke ukuthi enze inqubo yokuvuselela.

Iqembu likaPicco lizobhekena ne-Tshwane University of Technology Ladies FC ngeSonto e-Tsakane Stadium. Umdlalo uzoqala ngehora le-5 ntambama, kanti umdlalo uzovezwa bukhoma ku-SABC1.

Umthombo wesithombe: @JVWGirlsFootball