Lubhalwe nguMichael Madyira
IKaizer Chiefs ilahle amaphuzu emdlalweni wesibili we-Premier Soccer League kulandela ukushaywa iSekhukhune United ngegoli elilodwa eqandeni enkundleni iPeter Mokaba ngeSonto.
Lisizile igoli likaSammy Seabi alishaye ngomzuzu wesine njengoba lenze iSekhukhune yaqedela iKaizer kabili kulesizini, okufike esiphethweni sesizini yawo yemidlalo emihlanu yokungahlulwa kuligi.
Yenze iphutha elikhulu iKaizer njengoba ivume ukulahlekelwa amaphuzu amahlanu emidlalweni yayo emibili yeligi ngemuva kokuthi ibambene ne-Marumo Gallants (1-1) emdlalweni odlule.
Abafana baka-Arthur Zwane bahlezi endaweni yesine ku-PSL ngamaphuzu amahlanu ngaphansi kwezimbangi zase-Soweto, i-Orlando Pirates, ehlule i-Cape Town City ngamagoli amabili kwelilodwa emahoreni angu-24 ngaphambili.
Njengoba iChiefs yenze amaphutha amancane kule sizini, ihlulwe ngesikhathi esimqoka njengoba isinomsebenzi omkhulu wokubamba amaqembu angaphezulu kwayo.
Umphumela wangeSonto wenze iSekhukhune yakhuphuka isuka endaweni yesishiyagalolunye kweyesithupha esicongweni.
UZwane ufake uCole Alexander owayegcine ukubonakala emdlalweni wangoMfumfu nyakenye.
Izimbangi zabo iSekhukhune bezishoda nomdlali wase-Zambia olimele uRodrick Kabwe.
Kuthe womabili la maqembu engakahlali kahle emdlalweni, uSiyabonga Ngezana wehlulekile ukuthatha ibhola ebeliphethwe nguChibuike Ohizu, ibhola lawela kuSeabi, odlule uBrandon Petersen washaya igoli.
Ngomzuzu ka-21 unozinti weSekhukhune, u-Badra Sangare ubevala wonke amakhona epalini wabamba ibhola likaKeagan Dolly.
Ekuqaleni kwesiwombe sesibili, uDillan Solomons uzame ukugijima yedwa, kodwa umzamo wakhe wokugcina ube buthaka.
UPetersen ube esevimba ibhola likaVusumusi Mncube elivela eceleni kwebhokisi ngomzuzu ka-54.
Imizamo yokuhlasela kweChiefs ayizange iphumelele njengoba iqembu lasekhaya lihluliwe.
Isithombe esingenhla: U-Ashley du Preez weKaizer Chiefs odlulisa ibhola phambi kuka-Edwin Gymah
Umthombo wesithombe: IKaizer Chiefs