“Ukube nje indodana yami yangilalela” kusho umama wombulali

Kabelo Tlhabanelo

U-Emily Mohlafu oneminyaka engama-59, uthi inkani yendodana yakhe iholele ekutheni agwetshwe iminyaka engama-20 ebhadla ejele ngecala lokubulala.

Uthi, ubudlelwano bendodana yakhe kanye nonina wezingane zakhe bese buphenduke ubuthi kangangoba wayeluleka indodana yakhe ngokuthi ihlukane nonina wezingane. Kepha ukuncenga kwakhe kwawela ezindlebeni ezingezwa.

Emasontweni amabili edlule, indodana ka-Emily, uTshokolo Mohlafu oneminyaka engama-35, ugwetshwe ngecala lokubulala intombi yakhe eyayikhulelwe uLiza Tyumbo owayeneminyaka engama-23, wase-Reddersburg, e-Free State.

“Ngifisa sengathi ngabe uTshokolo wangilalela. Bheka ukuthi inkani yakhe imfikisele kuphi, ejele, yamphuca ikusasa lakhe futhi yamshiya negazi ezandleni zakhe,” kusho u-Emily.

Utshele abakwa-Scrolla.Africa ukuthi uTshokolo wamthembisa ephindelela ukuthi uzohlukana noLiza.

“Wayemthanda ngokweqiniso waze wahlukana nomunye wesifazane ngenxa kaLiza.”

U-Emily uchaze ukuthi impilo yakhe ithinteke kanjani ngenxa yobugebengu bendodana yakhe kanye nesinqumo sejaji.

“Ibuhlungu inhliziyo yami ngoba angikwazanga ukuya ecaleni lasenkantolo ngesikhathi egwetshwa. Ngehle ngesisindo esikhulu emzimbeni futhi bengikhala ngize ngilale njalo ebusuku. Kepha akukho ebengingakwenza, ubulungiswa bekufanele benziwe. Ngibona sengathi iminyaka engama-20 miningi kakhulu.”

Ubaba kaLiza, uMohowane Sehlatsana, owazibonela ngawakhe ngesikhathi kugwazwa uLiza futhi nowazama ukunqanda uTshokolo, uthe banelisekile ngesinqumo seNkantolo eNkulu.

“Wazama ukungigwaza ngaphezulu emzimbeni kodwa ngakwazi ukumnqanda wangigwaza umunwe. Lesi sigameko sangiphatha kabi kakhulu futhi sikholwa ukuthi ubulungiswa benzekile.”

Ubuye wathi: “Ngiyajabula ukuthi angilahlekelwanga ngumunwe.”

Izingane ezimbili ezincane, ezishiywe zingenabazali, manje sezinakekelwa ngumama kaLiza, uSellwane Tyumbo.