Menzi Magubane
Ngesizini edlule unozinti weKaizer Chiefs, u-Itumeleng “Spiderkid” Khune, uthwale kanzima eqenjini selokhu aqala ukudlalela leli qembu ngo-2007.
Lo mdlali owake wadlalela iBafana Bafana wehle kakhulu efomini ngemuva kwalokho wakhishwa ebhentshini wafakwa kwababukelayo. Ukungadlali kahle kwakhe kwakamuva kumenze wabonakala kanye nje kuphela ngesizini edlule.
Ngokufunda amakhono akhe okuba ngunozinti kubadlali abafana noBrian “Spiderman” Baloyi kanye noRowen Fernandez, uKhune ubukeka elahlekelwe indawo kwiChiefs.
Uzakwabo wakudala uBaloyi ubona sengathi lo mdlali (34) udinga ukubonana nochwepheshe.
“Ngiyazi njengabantu abamnyama asikholelwa kakhulu kwi-Psychology, kodwa ngicabanga ukuthi uKhune udinga uchwepheshe wezengqondo,” kusho uBaloyi.
“Unesikhathi manje. Uma ezinika esikhathi esanele manje, uma kuqala isizini ezayo uzobe esenze umsebenzi omkhulu.”
UKhune ungomunye wabadlali abadlala kahle kakhulu ebholeni lakuleli, usedlale imidlalo engu-91 kwiBafana Bafana okuhlanganisa neNdebe yoMhlaba ye-Fifa yango-2010 kanye ne-Africa Cup of Nations yango-2008 nango-2013.
KwiChiefs usedlale imidlalo engu-266 kuze kube manje futhi uwine izindebe eziningi naleli qembu.
UBaloyi ubona sengathi usengabamba iqhaza elikhulu kwiChiefs nakuba esekhulile kodwa uthi kuzomele athole usizo.
“Siyalazi ithalente analo u-Itu, kodwa kumele akholwe ukuthi usenakho okudingekayo ukuze akwazi ukuphumelela. Angiqondi ukuthi kungani ezivumele ukulahlekelwa iminyaka eminingi kangaka. Iminyaka ebaluleke kakhulu emsebenzini wakhe njengonozinti,” esho.
“Ukumosha okuningi kangaka ngemuva kokuba nomsebenzi omuhle kangaka akulungile.”
Ngesonto eledlule Amakhosi axoshe abadlali abayishumi abadala kanti uKhune ubengekho kulabo badlali.
Kusobala ukuthi umqeqeshi omusha u-Arthur Zwane usakholelwa ekutheni isipiliyoni sakhe singasiza ithimba lezobuchwepheshe elisha ukufeza izinhloso zeqembu ngesizini ezoqala.
Ngesonto eledlule uKhune ubehambele inkundla ye-Fifa yokuqeqesha onozinti ebise-Safa Technical Centre.
Umthombo wesithombe: @AfricaTopSports
.
