Lubhalwe nguCelani Sikhakhane
UKhongolose uthele ngehlazo uMkhonto weSizwe Party ne-IFP ngesikhathi uhlwitha isigceme seNkatha okhethweni lokuchibiyela laseMgungundlovu obelubhekwe ngabomvu kulamaqembu ngoLwesithathu.
I-IFP ishawe yenaba nefolosi layo uMnuz Mbengeni Shezi njengoba iphucwe lesisigceme ebesisiphethe yathola amavoti angu-344 kuphela.
UMkhonto weSizwe Party obubhekene nempi enkulu yabaholi kubangwa okuzofoloswa ngaye phakathi kukaMnuz Nkosinathi Mshengu noMnuz Sthabiso Nkabinde, ushawe wathola amavoti angu-1160.
UKhongolose obugadla ngoMnuz Nduduzo Zuma ukhale wemuka nale sisigceme ngamavoti angu-1602.
Lesisigceme sisale dengwane ngesikhathi i-IFP ikhomba indlela ikhansela layo ebelidumile uMnuz Babashani Ndlela abebemsola ngokuphuza nabafundi baseNyuvesi utshwala.
UNtuli uzamile ukuluvimba lolu khetho ngoLwesibili kodwa iJaji uRob Mossop yathi akukho okuphuthumayo ngesicelo sakhe nokwenze ukhetho lokuchibiyela laqhubeka.
Ngakolunye uhlangothi kuMkhonto weSizwe Party bekumapeketwane njengoba amafolosi agcine esemabili kwabonakala sekubanga abaholi.
UMnuz Willies Mchunu ugcine esefaka enkantolo abaholi baleli qembu eSishayamthetho okunguMnuz Thobani Zuma noDkt Kwazi Mbanjwa ngoba kubangwa okuzofoloswa ngaye.
UMchunu ubefuna uMnuz Nkosinathi Mshengu bese kuthi uZuma noMbanjwa bebefuna uNkabinde nokuvele emaphepheni aseNkantolo i-Scrolla.Africa esinawo.
UNobhala kaKhongolose KwaZulu-Natal uMnuz Bheki Mtolo uthe lokhu kuwuphawu lokushaya ibuya kwe-ANC eKZN ngemuva kokulahlekelwa ukwesekwa.
“Lemiphumela iyasikhombisa ukuthi uhlelo lombutho lokuzihlanza luyasebenza ngoba abantu babuya ngobuningi. Namanje bakhombisile ukuthi i-ANC kusewumbutho abawethembayo nokwazi ukuphatha kahle ulethele umphakathi izidingo kuzona zonke izinhlaka zikaHulumeni,” kusho uMtolo.
UNobhala-Jikelele weMKP uMnuz Floyd Shivambu uyavutha ngabaholi okuthiwa bazame ukukhipha igama likaMshengu obekhethwe umphakathi ukuba kufoloswe ngaye.
Uthe lokhu kuze kwaphoqa ukuba uMchunu ayenkantolo ngoba sebethole ukuthi kukhona ohambe ngemuva wayokhipha igama likaMshengu.
UShivambu uthi busazochitheka bugayiwe kulabo abathinteka kulo mkhonyovu.