Menzi Magubane
ISwallows izibekisele indawo kwi-DStv Premiership emdlalweni wokugcina wokuhlungela ukukhushulelwa kwi-PSL ngoLwesithathu ntambama, ihlula i-University of Pretoria ngo 1-0 enkundleni yezemidlalo iLucas Moripe, e-Tshwane.
Bekuwumdlalo obekufanele iSwallows iwuwine kanti igoli likaYagan Sasman ngomzuzu ka-61 lenze isiqiniseko sokuthi leli qembu lase-Soweto lizophinde lingene esigabeni esiphezulu ngesizini ezayo.
I-Swallows ibe yiqembu lesine kulandelana ukuwina ama-play-offs kumasizini adlule ngemuva kokuphuma endaweni yesibili kwi-Leapfrog Tuks.
Ngaphambi kokuthi umdlalo uqale, izimbangi zabo bezidinga iphuzu elilodwa kuphela ukuze zikhuphuke zibuyele kwi-Premiership ngemuva kokunyamalala iminyaka eyisithupha. Kodwa-ke i-Swallows idlale kahle zisuka nje, ngemuva kokushaya i-Cape Town All Stars ngo-2-1 ezinsukwini ezine ezedlule.
Umqeqeshi wabo uDylan Kerr ubekhala izinyembezi ngemuva kwempempe yokugcina.
“Ihlandla lami lesine ngikule midlalo namaqembu ahlukene futhi ngiyakuzonda lokho. Ngakuzonda ngaleso sikhathi namanje ngisakuzonda. Le midlalo ingiphathisa ngekhanda nenhliziyo ebhlungu,” esho ngemuva komdlalo.
“Kuzomele sifunde isifundo kule sizini ezayo. Nabaphathi kumele bakhuphule izinga ngesizini ezayo. I-PSL iyiligi enhle kodwa kumele ithuthuke ibuyisele abalandeli enkundleni,” kusho uKerr obevutha engabaselwe.
UKer usazonikwa isikhundla esigcwele ngabaphathi kanti unethemba lokuthi lokhu kuzoshintsha ngemuva kokugcina leli qembu kwi-Premiership. Uthathe izintambo ngasekupheleni kwesizini ka-2021/22 kuBrandon Truter, osengumqeqeshi waMaZulu.
Umthombo wesithombe: @UnplayableZA
.
