Lubhalwe ngu-Anita Dangazele
Umfana owashawa umbani uphoqeleka ukuthi agibele ihhashi uma eya esibhedlela njengoba amatekisi enqaba ngenxa yokunuka komlenze wakhe.
Udokotela kuthiwa unqabile ukwelapha lo mfana ngemuva kokuthi umndeni ukhale kubaphathi besibhedlela ngokunganakekelwa.
Umfana oneminyaka engu-16 ubudala waseQumbu e-Eastern Cape uke agibele ihhashi uma eya esibhedlela nakuba esezinhlungwini ngoba amatekisi awamhambisi ngenxa yenxeba lakhe elinukayo.
Akagcini ngokuphoxwa ngabashayeli bamatekisi kodwa ngisho nodokotela abafuni ukumsiza.
UMandilakhe Zonyane washaywa wumbani ngoLwezi ka-2023.
Manje uthi udokotela waseNelson Mandela Academic Hospital uyanqaba ukulapha inxeba lakhe elibuhlungu emlenzeni ngoba umndeni womfana wakhala kubaphathi besibhedlela ngokungalutholi usizo.
“Wangitshela ukuthi ‘Angisoze ngakusiza ngoba uzame ukungenza ngilahlekelwe umsebenzi. Waya kubaphathi bami ngemuva kwami futhi ngenxa yalesi sizathu, ngeke ngiphakamise isandla ukuze ngikusize,” uMandilakhe obekhala etshela iScroll.Africa.
Unina u-Ambesiwe Zonyane uthe isikhathi esiningi kumele baboleke imali yokuqasha imoto ezimele ezomyisa esibhedlela e-Nessie Knight e-Sulenkama.
“Ngaso sonke isikhathi uma uMandilakhe eyovakashela eMthatha, kudingeka siboleke imali yokuqasha imoto ezimele ezomyisa esibhedlela e-Sulenkama lapho okudingeka alale ngayizolo phansi, ukuze azothola i-ambulensi yokuqala ephuma ekuseni,” usho kanje.
Uma bengenayo imali yokugibela uMandilakhe kumele agibele ihhashi aye esibhedlela. “Uhlale ekhala ngokuthi uba nobuhlungu obukhulu njalo uma kumele agibele ihhashi, nokuthi ubelokhu ebuyela eNelson Mandela [Academic Hospital] ngaphandle kokusizwa,” kusho unina.
Umndeni ucele isihlobo sakhe uLindiwe Harmans ukuthi angenelele. Wathinta isikhulu sesibhedlela esithembise ukusiza.
“Ngafonela isikhulu ngasitshela ngosizi lukaMandilakhe, wathembisa ukuthi uzongeniswa futhi ngeke aphume esibhedlela ngaphandle kwe-skin graft, wangeniswa wabuye wakhishwa wahanjiswa nge-ambulensi eyiswa e-Sulenkama.
“Sithole ucingo lokuthi sizomlanda esibhedlela ngoba akanawo umbhede, kwaphinde kwadingeka ukuthi sikhiphe imali yokuqasha imoto,” kusho uHarmans.
Ngomhlaka-13 kuZibandlela, udokotela kuthiwa wenqaba ukusiza uMandilakhe wamhambisa ngaphandle kwemithi namabhandishi.
“Sengilahlekelwe yithemba ngoba umlenze wami uhlezi ubuhlungu ngenxa yephunga eliphuma kuwona, angisakwazi nokudlala nezinye izingane,” kusho uMandilakhe owagcina eyeke isikole ngo-2024 ngenxa yempilo yakhe. Ubuyile esikoleni manje kodwa uyaphuthelwa amakilasi ngezinsuku zemvula lapho ubuhlungu bomlenze buba bubi nakakhulu.
Igama likadokotela laziwa iScrolla.Africa.
UMnyango wezeMpilo e-Eastern Cape ubungakaphenduli esicelweni sokuthi uphawule.
Esithombeni esingenhla: UMandilakhe nonina u-Ambesiwe Zonyane.