Sizwe Sibiya
Umdwebi uBonolo Kavula uklonyeliswe ngo-R500,000 yi-Norval Art Foundation ngomsebenzi wakhe wobuciko osihloko esithi-Tswelopele, okusho ukuthi “intuthuko” ngesi-Suthu.
Umdwebi wase-Kimberly wakha ucezu esebenzisa imicu nezingcezwana ezincane ezichotshozwe ngendwangu yesi-shweshwe – indwangu kakotini ephrintiwe ngodayi esetshenziswa kabanzi ezimpahleni zomdabu zaseNingizimu Afrika.
Ukuwina i-Norval Sovereign African Art Prize – umklomelo wobuciko omkhulu kunawo wonke e-Afrika – kunikeza uKavula ithuba lokusingatha umbukiso eyedwa.
“Nakanjani ngikubheke ngabomvu ukuba nombukiso wami ngedwa,” kusho uKavula.
“Lokhu kufana nenselelo, engiyidingayo, yokungigcina ngizibambele mathupha. Ngihlale ngicabanga ngemibono eminingi futhi manje senginokuthile engikusebenzelayo nengikulindele ngabomvu, futhi ukuba nombukiso e-Norval Foundation kuyinto enkulu ngempela”.
Ngonyaka odlule, uKavula wafakwa ukuthi abonise ubuciko bakhe eyedwa yi-SMAC Gallery e-Art Basel e-Miami.
Khonamanjalo umdwebo kaRene Tavares wase-Sao Tome and Principe uzuze ivoti lomphakathi eliku-inthanethi, wabatholela u-R25,000 ngomsebenzi wabo wobuciko ophathelene nefa lobugqila.
Imisebenzi yobuciko engu-29 yabasohlwini olufushane abazongenela ukhetho izohlungwa endalini ye-inthanethi ehlelwa i-Sotheby’s, lapho amateku angu-200 ayenziwe uVirgil Abloh ongasekho adayiswe ngo-R375 million ngesonto eledlule.