Lubhalwe nguRorisang Modiba
UJimmy Tau noThabile Ngwato babophe ifindo likasofa silahlane ngasese, bekumenywe umndeni osondelene nabo kuphela.
Lezi zithandani zivuselele uthando lwazo ngemuva kobudlelwano baphambilini, okuhlanganisa uTau noTsholofelo Mhlongo noSizakhele Manonga.
Owayengumdlali webhola uJimmy Tau ushade noThabile Ngwato oyisikhulu sezindaba ngasese.
UTau owayedlalela i-Kaizer Chiefs ne-Orlando Pirates, uthe “I do” kuNgwato, oyisikhulu se-Newzroom Afrika, emasontweni amabili edlule. Laba bashadikazi benza izifungo e-Muldersdrift, e-Gauteng, phambi komndeni osondelene kuphela nabangane abambalwa ababathembayo.
Bonke ababekhona batshelwa ukuthi bangatsheli muntu ngalo mcimbi.
Lo mshado uyisiqalo esisha kuTau noNgwato, ubuhlobo babo obuke baba nezingqinamba ezimbalwa eminyakeni edlule. Baqala ukuthandana eminyakeni embalwa edlule kodwa bahlukana ngezizathu ezingaziwa.
Ngemva kwalokho, bobabili bahamba ngezindlela zabo ezihlukene. UTau waqala ubuhlobo noSizakhele Manonga. Kuthiwa wamkhokhela u-R200 000 welobolo kodwa izinto azihambanga kahle ngemuva kwezinsolo zokuthi uyaphinga kanti lokhu bekuthinta ilungu le-Major League DJz uBandile Mbere. UMbere uzichithile lezi zinsolo, kubika i-Sunday World .
UNgwato naye uqhubekele phambili nempilo yakhe ngasese.
Kubikwa ukuthi uTau wahlukana nomkakhe kanye nonina wengane yakhe uTsholofelo Mhlongo, waphinde watholana noNgwato futhi.
Abasondelene nabo bachaza ukuhlangana kwabo ngokuthi “indaba yezinhliziyo ezimbili ohambweni olulodwa,” bephakamisa ukuthi indaba yabo yothando yayihlale ihloselwe ukuqhubeka.
Umshado kaTau wangaphambilini kuthiwa uyaphela.
Abangaphakathi bathi uMhlongo akazange ajabule kulobu budlelwano obaqala esemncane kakhulu.
Kuthiwa wadela ubuhlobo bakhe noyise owayengumnganj noTau ukuze ahlale naye, kodwa kwangenzeka njengoba wayefisa.
Osesithombeni esingenhla: UJimmy Tau.
Umthombo wesithombe: @jimmytau_2