Lubhalwe nguRorisang Modiba
UJanet Jackson uhoxise ukubamba kwakhe iqhaza kwiDStv Delicious Festival eNingizimu Afrika kulandela ukudlula emhlabeni kukamfowabo, uTito Jackson, obeyilungu leJackson 5.
Lesi sihlabani somculo bekumele sibe ngomunye wabaphambili emhlabeni wonke kule festiveli yezinsuku ezimbili ezoba ngomhlaka-21 no-22 kuMandulo.
Abaphathi bakhe bathi: “Umfowabo kaJanet uTito ushone ngeSonto eledlule. Kuyaqondakala ukuthi uJanet kumele ahoxise ukubonakala kwakhe kwiDStv Delicious Festival ukuze abe nomndeni wakhe.
“Kunezinhlelo zokuthi uJanet abuye ngonyaka ozayo. Uphinde abonge abalandeli bakhe baseNingizimu Afrika ngokumeseka kulesi sikhathi esinzima.”
Abahleli befestiveli baphezu kwamalungiselelo ukumemezela omunye umculi osisematheni emhlabeni jikelele khona maduze nje ukuvala isikhala sikaJanet Jackso.
“Sidlulisa ukuzwelana kwethu okujulile kuJanet nomndeni wakhe.”
“Yize abaningi bekujabulele ukumbona enandisa, senza konke okusemandleni ethu ukuze sithole omunye umculi ohamba phambili emhlabeni wonke kule festivali.”
Esithombeni esingenhla: uJanet Jackson.
Umthombo: X