Lungani Zungu
UJacob Zuma, indoda edume ngokuba namaqhinga amaningi okubambezela wethule isicelo sokufuna ukuqulwa kwecala lakhe lokukhwabanisa izikhali lihlehliswe ngesonto elilodwa njengoba kulindeleke ukuthi liqulwe ngoMsombuluko.
Abammeli bakaZuma bathi abakwazanga ukuhlangana naye ngenxa yemibhikisho – ebiyenziwa egameni lakhe – ehlasele iKZN ne-Gauteng ngesonto eledlule.
Esitatimendeni sangoLwesihlanu, iHhovisi Lejaji Elikhulu lithe lolu daba luzobanjelwa ku-intanethi.
Kodwa iJacob Zuma Foundation ayivumelani nalokho, ithi ifuna lolu daba ludingidwe bonke bekhona ziqu zabo.
Okhulumela le nhlangano uMzwanele Manyi, uthe bafuna uZuma adedelwe ejele ukuze avele eNkantolo eNkulu yaseMgungundlovu.
Uma ingabanjwanga mathupha, inhlangano icele ukuthi lolu daba lumiswe luze ludingidwe mathupha.
UZuma, obhekene namacala ayi-18 avela ku-Arms Deal, ubelwela namacala abhekene nawo ukuthi aphonswe ngaphandle kwenkantolo.
UZuma usecele ukuthi kuhoxiswe umshushisi woMbuso u-Advocate Billy Downer SC.
Uveze uchungechunge lwezinsolo eziyinqaba ngesicelo sakhe, kufaka phakathi izinsolo zokuthi uDowner kusolwa ukuthi wakha itulo nezinhloli zaseMelika ezivela kwi-CIA.
.
