Lubhalwe nguRorisang Modiba
UMaNgobese-Zuma uthi iVuma FM yenqabile ukumchazela ukuthi kungani inkontileka yakhe yeminyaka eyisithupha iphelile.
Lesi sishoshovu sikholelwa ukuthi ukusebenza kwaso nenhlangano iMarch and March kungenzeka kube nomthelela esinqumweni sesiteshi sokunqamula ubudlelwano.
UNkk Jacinta Ngobese-Zuma uthi akukho angakwenza ngaphandle kokuthi alwe nowayengumqashi wakhe enkantolo ngemuva kwalokho akubiza ngokuxoshwa ngendlela engafanele nengachazeki.
Lo msakazi osenesikhathi eside eyisishoshovu esebenze kwiVuma FM iminyaka eyisithupha, ebiza lo msakazo “ngekhaya lesibili”. Kodwa ngoNtulikazi inkontileka yakhe yanqanyulwa kungazelelwe.
Abameli bakhe babhalele lesi siteshi ngomhlaka-1 kuNcwaba becela izizathu. IVuma FM yaphendula ngemuva kwamasonto amathathu, mhlaka-21 kuNcwaba, kodwa ayizange ichaze. “Bathi akumele babeke izizathu. Angikwamukeli lokho,” kusho uMaNgobese-Zuma.
Uthe isithunzi sakhe sisengcupheni. “Emsakazweni, isithunzi siyikho konke. Angikwazi ukushiya ngenxa yokungabazwa kube kusabalala izindaba ezingamanga.”
UMaNgobese-Zuma ukholelwa ukuthi ubushoshovu bakhe kungenzeka bube nesandla ekuxoshweni kwakhe kungazelelwe. Ngasekuqaleni kwalo nyaka uqale umkhankaso weMarch inMarch, umkhankaso wokulwa nabantu bakwamanye amazwe abakuleli ngokungemthetho.
Lo mkhankaso usuthole ukugxekwa kosopolitiki, iHelen Suzman Foundation nezinye izikhulu zikahulumeni.
Yize kunengxabano yezomthetho, uMaNgobese-Zuma uthi uphokophele izinhlelo ezintsha ngesikhathi abameli bakhe beqhubeka necala.
Osesithombeni esingenhla: uJacinta Ngobese-Zuma.
Umthombo wesithombe: @jacintangobese