Uhleli kahle e-Spain umsubathi we-Basketball ngemuva kokubaleka ezweni lakhe

Dylan Bettencourt

Abasubathi abambalwa besifazane babaleke e-Afghanistan ngemuva kokuthi i-Taliban iphinde yathola amandla kuleliyazwe kodwa kumdlali we-basketball uNilofar Bayat ukwesaba kuya ngokuncipha.

UBayat wayengukaputeni weqembu le-basketball labesifazane lase-Afghanistan labahamba ngezihlalo ezinamasondo kodwa ngemuva kokubaleka e-Taliban wathuthela e-Spain, kanti kusukela impilo ayizange ibe lula kakhulu.

“Akulula ukuzihlanganisa nomphakathi omusha ngoba konke kuhlukile. Bekuyinselela kimi ukwazi ukuthi kufanele ngiziphathe kanjani kubantu nokuthi ngihlala kanjani lapha, ” kusho lo mdlali oneminyaka engu-28 etshela abe-Reuters.

UBayat nomyeni wakhe bamukele isicelo sokudlalela i-Bidaideak BSR Bilbao, iqembu lebhola lomnqakiswano elinobulili obuhlukene e-Spain.

UBayat walimala umgogodla ngesikhathi eneminyaka emibili ubudala ngemuva kokuba irokhethi lishaye umndeni wakubo ekhaya e-Kabul.

Phakathi kwezithiyo uBayat abhekana nazo bekuwulimi lase-spain.

“Ukudla kuhle, abantu bakhona balungile, kodwa angikwazi ukwabelana nabo ngemizwa yami nemibono yami,” kusho lo msubathi.

UBayat ubefunda i-Spanish emzamweni wokuthuthukisa amathuba akhe okuzinza e-Europe.

UBayat uphinde abe ngummeli oqeqeshiwe ezweni lakubo futhi unezifiso zokusungula inhlangano esiza abesifazane abakhubazekile e-Afghanistan nase-Spain.

“Ngifuna ukuhlala lapha ngisebenzele abesifazane abalapha e-Spain. Ngiyazi ukuthi kumele baqale kanjani impilo besuka phansi njengami,” kusho lo msubathi.

UBayat nomyeni wakhe abakaze badlale kahle kusukela befika e-Spain ngenxa yesimo sabo sokuthuthela kwelinye izwe. UMengameli weqembu le-basketball uthe bobabili bazokwaziwa maduze nje njengabantu ababaleka ezweni ngenxa yepolitiki futhi bazovunyelwa ukudlala.

UBayat nokho usakhathazekile ngokuthi abantu bakubo balahlwa amazwe angaphandle.

“Wonke umuntu uyayikhohlwa i-Afghanistan. Akekho okhuluma ngezwe lami,” kusho uBayet.

Umthombo wesithombe: @Reuters

Izihloko zakamuva