Lubhalwe nguBuziwe Nocuze
Owesifazane oneminyaka engu-28 ubudala wasePhilippi wesabela ukuphepha kwakhe ngemuva kokuba obeyisoka lakhe elamshaya waquleka, lisahamba ngokukhululeka ngaphandle.
Uthe umfakela ingcindezi ukuthi asule amacala futhi umthembisa imali kodwa amaphoyisa abengakokwenzi lutho ngalokhu.
Owesifazane oneminyaka engu-28 ubudala wasePhilippi uhlala ngokwesaba njengoba obeyisoka lakhe elamshaya waquleka lisengaphandle ngemva kwenyanga ebike lolu daba emaphoyiseni.
Owesifazane uhlaselwe ngomhlaka-4 kuMfumfu ngemuva kokubuza ukuthi isoka lakhe liyaya yini emsebenzini.
“Wangishiya nemihuzuko, isono sami kwaba ukubuza ukuthi akasayi yini emsebenzini, wabe esengishaya ethi ngiyamlawula. Ukubuza isoka lakho lowo mbuzo akusho ukuthi kumele ushaywe. Amaphoyisa akwa-SAPS ayazi ngamacala futhi angizizwa ngiphephile,” kusho yena.
Njengamanje obeyisoka umfakela ingcindezi ukuthi asule amacala.
“Angizizwa ngiphephile kade ngithola imiyalezo evela kuye ethi angilihoxise yena uzongibika imali nyanga zonke. Kubukeka sengathi ngizodayisa ngempilo yami,” esho.
Umgilwa uthe wamshaya kanzima.
“Ungishaye ngendlela yokuthi bengivaleke amehlo, ubuso bami buvuvukele ngingakwazi ukuphuma ngaphandle, wakhiya umnyango waxosha abantu abeza ukuzongisiza. Ngicabanga ukuthi ubefuna ukungibulala ngoba wangishaya ngaze ngaquleka,” kusho yena.
Okhulumela amaphoyisa u-Andisiwe Manyana uliqinisekisile icala.
“Ngokwemibiko, ummangali waxabana nesoka lakhe ngesikhathi liqala ukumxosha endaweni yakhe. Ube esecela izinto zakhe, kulapho-ke enqaba khona wavala umnyango, waqala ukumshaya waze waquleka,” kusho uManyana.
Akukaboshwa muntu.
Esithombeni esingenhla: Amaphoyisa.
Umthombo: Ifayela