Lubhalwe nguDoreen Mokgolo
● Ohola impesheni e-Springs usebenzisa imali yakhe yesibonelelo sikahulumeni ukondla izingane ezingenamakhaya ezingu-30 endaweni yakhe yokuhlala ngoba akalutholi usizo lukahulumeni.
● Indawo yokukhosela igcwele ngokweqile futhi ayinawo ugesi ngenxa yesikweletu esatholwa umnikazi wangaphambilini.
Ohola impesheni e-Springs usebenzisa imali yakhe yesibonelelo sikahulumeni ukuze yondle izingane ezingenabani ezingu-30 ngoba uhulumeni akafuni ukumsiza ngendawo yakhe yokukhosela ebhalisiwe.
Okuxakayo ukuthi umnyango kahulumeni wase-Gauteng udlulisela izingane ezilahliwe ezingenamakhaya kule ndawo yokukhosela.
UMariam Ntsele wavula ikhaya lakhe eminyakeni engu-15 edlule, ngethemba lokuthi lizoba yindawo ephephile yezingane ezisengozini eKurhuleni. Kodwa namuhla uyakulwela ukuqhubeka nalokhu.
“Sengizame kaningi ukufuna uxhaso kodwa bahlale benqaba isicelo sami bekhala ngokuthi umnyango awunayo imali,” kusho uNtsele.
“Kodwa wona lo mnyango uletha izingane lapha njalo ngezimpelasonto zingenalo ngisho isenti elizosiza ukuzondla zize zithole indawo yokuzifihla ikhanda.
“Ngimdala futhi ngikhathele kodwa angikwazi ukuxosha izingane nakuba ngingenayo imali yokuzinakekela,” etshela i-Scrolla.Africa.
Indawo yokukhosela ithatha izingane ezincane kuze kufike eminyakeni engu-18.
Abanye babekwa lapho okwesikhashana ngosonhlalakahle noma amaphoyisa ngesikhathi belinde indawo eyikhaya abhalisiwe ukuba baye kuyo. Abanye balahlwa abazali abangabuyi.
Indlu enamakamelo amabili manje igcwele iyachichima.
Amantombazane alala emakamerweni okulala kuyilapho abafana bahlala ezindlini zokukhosela ezakhiwe ngamashidi namanethi.
Abanye baze balale endaweni yokupaka izimoto.
Ugogo kumele akhokhele umfaniswano wesikole, imali yokukhokhela izinto zokubhala neyemoto ehambisa abantwana esikoleni.
Ukhokhela nabesifazane abasiza ekunakekeleni izingane.
Ikhaya alinawo ugesi. Umasipala waseKurhuleni linqamule ugesi ngenxa yesikweletu esidala esasikweletwa umnikazi wangaphambilini womuzi.
UNtsele uthembele emalini yakhe yempesheni, iminikelo evela emphakathini ngezikhathi ezithile nokudayisa amakhekhe ukuze kugcinwe indawo yokukhosela.
“Akukho engingakwenza ngaphandle kokuthi ngiqhubeke nokusiza lezi zingane kungenjalo zizosala dengwane,” kusho yena.
UMnyango wezokuThuthukiswa koMphakathi e-Gauteng awuzange uziphendule izicelo zokuthi uphawule.
Osesithombeni esingenhla: UGogo Maria Ntsele.
Umthombo: Doreen Mokgolo