Lubhalwe nguDylan Bettencourt
UNgqongqoshe Wezemidlalo uGayton McKenzie uvikela isinqumo se-CAF sokudlala i-Africa Cup of Nations njalo eminyakeni emine ngemuva koshintsho lwa-2028.
UMcKenzie uyazichitha izinsolo zeFifa namaqembu ase-Europe aphoqa ukuthi kube noshintsho ethi uPatrice Motsepe uzimele futhi ulwela izintshisekelo zebhola lase-Afrika.
UNgqongqoshe wezeMidlalo uGayton McKenzie usephumele obala ngokumeseka umengameli weCAF uPatrice Motsepe nesinqumo sokushintsha ukuthi i-Afcon idlalwa kangaki.
I-CAF imemezele ukuthi i-Africa Cup of Nations izosuka emzuliswaneni weminyaka emibili idlalww njalo eminyakeni emine ngemuva komqhudelwano ka-2028.
Abanye abagxeki bathi lesi senzo siphushwe yiFifa namaqembu ase-Europe angafuni abadlali bahambe maphakathi nesizini. UMcKenzie uthi lowo mbono awulungile.
“UPatrice angaswayipha u-Infantino ngekhadi lokonga,” kusho uMcKenzie, echitha izinsolo zokuthi uMotsepe ulawulwa yiFifa.
Uthe uMotsepe ulethe inhlonipho nokuhleleka ebholeni lase-Afrika futhi akufanele abukeleke phansi.
“UPatrice Motsepe uyishintshile i-CAF. Ulethe ubungcweti,” kusho uMcKenzie. “Manje abantu bathi usephaketheni lika-Infantino. Kumele siyeke ukwenza lokhu kubantu bakithi.”
I-Afcon sekuphele amashumi eminyaka idlalwa njalo ngemuva kweminyaka emibili. Kepha izinkinga zesimo sezulu kanye nokungqubuzana namaligi ase-Europe kuholele ezinguqukweni ezimbalwa emiqhudelwaneni yakamuva. Ama-edishini ahlelelwe u-2023 no-2025 womabili agudluzwa, okuphoqe i-CAF ukuthi ibambe imiqhudelwano ibuyele emuva kuze kube ngu-2028.
I-CAF ithi lo mjikelezo omusha weminyaka emine uzovikela abadlali abavame ukuphoqeleka ukuthi bawashiye amaqembu abo ngezikhathi ezimatasa. Le nhlangano ithi izosiza nangokuhlela nokuxhasa.
Abaqeqeshi abavela emazweni afana ne-Egypt neMali basigxekile lesi senzo. Bathi ibhola lase-Afrika seliphinde lavumela ingcindezi yase-Europe.
UMcKenzie uyaphika. Uthi ibhola lase-Afrika kumele likhule lihambisane nezinga lomhlaba.
“Ibhola lethu alikabi khona,” kusho yena. “Kodwa lena indlela okufanele siyilandele.”
Uphinde waveza isimo esingesihle kwamanye amaligi akuleli.
“Amanye amaligi asanikeza isikhwama serayisi kuMan of the Match,” esho.
I-CAF ithi i-Afcon yokugcina edlalwa njalo ngemuva kweminyaka emibili izoba ngo-2028.
Esithombeni esingenhla: UGayton McKenzie.
Umthombo wesithombe: Ifayela