Lubhalwe ngu-Everson Luhanga
Ikhomishini kaMadlanga ilalele ubufakazi mayelana nokuhlangana kukaVusimuzi “Cat” Matlala noSenzo Mchunu abasolwa ngobandakanyeka emalini engaqondakali yomkhankaso.
Ufakazi utshele iKhomishini kaMadlanga ukuthi usomabhizinisi uVusimuzi “Cat” Matlala wayenobudlelwano obuseduze noNgqongqoshe uSenzo Mchunu nabanye ngesikhathi beqoqa izimali zomkhankaso.
UMchunu uphikile ukuthi uyamazi uMatlala noma uyayithola imali yokukhankasa njengoba ikhomishini ibheka inkohlakalo, ukugxambukela kwezokuphepha kombuso kanye nokuchema kwezepolitiki kwezomthetho.
IKhomishini kaMadlanga ilalele ubufakazi obushayisanayo mayelana nobudlelwano phakathi kukasomabhizinisi uVusimuzi “Cat” Matlala noNgqongqoshe wamaphoyisa osamisiwe uMnuz Senzo Mchunu.
Ufakazi ongaziwa, obizwa ngo-Witness C, wethule ubufakazi ngoLwesine ukuthi uMatlala usondelene noMchunu nezikhulu eziphezulu zamaphoyisa. UWitness C uyingxenye yethimba eliphenya ngokubulawa kosopolitiki.
Ngokusho kukafakazi (C), uMatlala uboshwe e-Midrand ngemuva kokuqhunyelwa isondo lemoto yakhe. Utshele amaphoyisa ukuthi wayesanda kuphuma emzini kalowo owayengukhomishana kazwelonke wamaphoyisa uRiah Phiyega.
UMatlala kuthiwa wathi wethulwa kuMchunu ngesikhathi UNgqongqoshe egaqele isikhundla sokuba nguMengameli we-ANC futhi edinga abazonikela ngemikhankaso. Ufakazi (C) uthe uMatlala wathi: “Ngibe nesandla kulo mkhankaso.”
Ikhomishana ilalele ukuthi uMatlala wasebenzisa inkampani ebizwa ngeGotlhe Specialists, ebuye yaziwe ngelikaKgontle, ukukhokha imali engango-R500 000 yezindiza, amahhotela nokuzijabulisa kubalandeli be-ANC abebehambele umgubho wangomhlaka-8 kuMasingana eKapa. Uhlu lwamagama kubikwa ukuthi luphuma kusomabhizinisi uBrown Mogotsi.
Kodwa uMchunu, ePhalamende, umile kwelokuthi akakaze ahlangane noMatlala waphika ukuthi kukhona ukwesekwa emkhankasweni wakhe.
Ufakazi (C) uthe amaphoyisa agasela emzini kaMatlala ngomhlaka-6 ngoZibandlela ka-2024 ethungatha usomabhizinisi owayethunjiwe uJerry Boshoga. Ngemuva kokugasela uMatlala ukhale kuMchunu noMogotsi kodwa lutho usizo.
UMatlala kuthiwa wasola ukuthi uMchunu wasebenzisa uphiko lwezokuPhepha koMbuso ukulandelela amaphoyisa abemphenya. UMogotsi wasolwa ngokuthola izinombolo zezimoto zalawo maphoyisa.
Ngokuhamba kwesikhathi, uMatlala wahlangana nowayenguNgqongqoshe wamaPhoyisa, uMnuz Bheki Cele, KwaZulu-Natal ukuze acele ukuvikelwa. UCele kuthiwa wamxwayisa ngokuthi angawavuleli amacala amaphoyisa.
UMatlala uthe unxuswe uMchunu, uMogotsi nePhini likaKhomishana wamaphoyisa uShadrack Sibiya ukuthi bavule amacala okuhlukumeza nawokweba kodwa wenqaba ukubandakanya umkakhe.
Ngesikhathi kutholakala izinto ezingahambi kahle enkampanini yakhe yonogada ngoZibandlela, uMatlala wacasha. Ufakazi (C) uthe uMatlala uzizwa esetshenziswa futhi engavikelekile, waxwayisa ngokuthi unamarekhodi azodalula abathintekayo.
Ikhomishini iphinde yabuka izingxoxo ze-WhatsApp ezikhombisa uMatlala noMogotsi belokhu bexhumana, nenombolo eyodwa ebhalwe ngoSenzo Mchunu. Le miyalezo ibidingida amathenda, ukuvikelwa kwamaphoyisa, i-IPID kanye nethimba eselihlakaziwe manje ebelibhekelela amacala okubulawa kosopolitiki.
IKhomishini kaMadlanga, eholwa ngumahluleli osewathatha umhlalaphansi eNkantolo yoMthethosisekelo uMbuyiseli Madlanga, iphenya ukuthi ukugxambukela kwezombusazwe, imali kanye namathuluzi okuvikela umbuso akuyingxenye yoxhaxha lwenkohlakalo ngaphakathi ohlelweni lobugebengu.
Esithombeni esingenhla: Cat Matlala.
Umthombo wesithombe: Ifayela