Lungani Zungu
UThulani Dlomo, indoda esolwa yiphini likaNgqongqoshe wezokuPhepha koMbuso uZizi Kodwa ngokuba ngomunye wabagqugquzeli bodlame nokuphanga impahla, uzinikele emaphoyiseni ngoLwesihlanu.
Ukuboshwa kwakhe kwenzeke ngesikhathi amaphoyisa eqala ukuqoqa abasolwa okukholakala ukuthi babhebhezele udlame e-KZN nase-Gauteng selokhu kwaboshwa owayenguMengameli wezwe uJacob Zuma ngesonto eledlule.
UDlomo wayeyinhloli enkulu ye-SSA futhi engumlandeli oqotho kaZuma.
Uqale wazichitha izimangalo ngoLwesihlanu kodwa ngokuhamba kwesikhathi wanquma ukuzinikela emaphoyiseni aseThekwini.
Esitatimendeni asikhiphe phambilini ngoLwesihlanu, uDlomo uthe wamangala kakhulu ngezinsolo ezibhekiswe kuye.
“Ngiyakwenqaba ngendelelo okuyifanele, noma yimuphi umzamo wokungixhumanisa nodlame olwenzeka ezweni.
“Lena yindlela yokugwema ukukhathazeka okuyikho mayelana nokuboshwa kukaMengameli uJacob Zuma kanye nokukhungatheka ngenxa yobumpofu bemiphakathi nabantu,” kufundeka ingxenye yesitatimende sakhe.
Umthombo wamaphoyisa ongagunyaziwe ukukhuluma nabezindaba ukuqinisekisile ku-Scrolla.Africa ukuthi uDlomo uzinikele ngabo-4 ntambama.
Ngaleso sikhathi, umthombo uthe uDlomo wayesesiteshini samaphoyisa eyophekwa ngemibuzo ngeqhaza lakhe asolwa ngalo ekuhlaseleni i-KZN ne-Gauteng.
UMengameli uCyril Ramaphosa uvakashele i-KZN ngoLwesihlanu eyohlola umonakalo odalwe yizixhwanguxhwangu ezinodlame eziqhubeke nokuphanga kusukela ngeSonto.
Ucele amaphoyisa ukuthi angabi nazwelo futhi abophe labo abakade bebhikisha.
Ngaphandle kokusho amagama, uNgqongqoshe obambile ehhovisi likaMengameli uKhumbudzo Ntshavheni, ukuqinisekisile ukuthi omunye umgqugquzeli ubanjwe ngoLwesihlanu ngemuva kokusabalalisa ividiyo efuna abantu babambe iqhaza ekuphangeni ngodlame.
Kusukela ngoLwesihlanu, isibalo sabashonile simi kwabangama-212. Kulaba, abayi-180 ngabase-KZN, kanti abangama-32 bavela e-Gauteng.
“Abomthetho basiqaphe ngeso lokhozi isimo eKZN naseGauteng,” kusho uNtshavheni.
“Isimo sesilawuleke ngokuphelele manje.”