Lungani Zungu
Akukhona okokuqala, abaphikisi bezombusazwe bakaBathabile Dlamini befuna ukuthi ashiye isikhundla sokuba nguMengameli we-ANC Women’s League.
Lowo owayenguNgqongqoshe wezokuThuthukiswa koMphakathi uvele eNkantolo yeMantshi yaseGoli ngoLwesibili ngezinsolo zokuqamba amanga ngaphansi kwesifungo ngesikhathi kuphenywa ngezinkokhelo zakwa-Sassa, ezaziholwa yiJaji eselathatha umhlalaphansi uBernard Ngoepe.
Icala lakhe lihlehliselwe uLwesihlanu oluzayo, lapho ezobekwa khona icala ngokusemthethweni.
UDlamini nguyena kuphela umngani kalowo owayenguMengameli wezwe uJacob Zuma osesikhundleni esibalulekile ku-ANC, ngemuva kokuthi abaholi abanjengo-Ace Magashule baxoshwe kuhulumeni.
Njengoba uMengameli weqembu uCyril Ramaphosa ekhipha abasekeli bakaZuma, kusazobonakala ukuthi uDlamini uzokwazi yini ukubambelela esikhundleni sakhe.
URamaphosa uqinisa isandla ngaphambi kwengqungquthela ebhekwe ngabomvu yokukhetha ubuholi be-ANC, okulindeleke ukuthi ibe ngoZibandlela ngonyaka ozayo.
Amanye amagatsha ase-Gauteng, lapho uRamaphosa enokusekwa okukhulu khona ngaphakathi ku-ANC, afuna uDlamini aphume esikhundleni ngokuhambisana nesinqumo seqembu sokuthi amalungu abhekene namacala kumele ashiye ngokuzithandela imisebenzi yawo kuze kube kuyaqinisekiswa ukuthi awanacala.
UDlamini wathweswa icala lokuqamba amanga ngemuva kokuthi iNkantolo yoMthethosisekelo yenze isiphakamiso sokuthi aphenywe ngowezi-2018 ngezinsolo zokuqamba amanga ngaphansi kwesifungo ngesikhathi kunenkinga yokukhokha imali yesibonelelo sikahulumeni.
UDlamini ubengathintwa ngesikhathi sikaZuma njengoba ekwazile ukumvikela kulabo ababemfuna ephumile esikhundleni kulandela inkinga yenkokhelo yezibonelelo zikahulumeni ngesikhathi esanguNgqongqoshe wezokuThuthukiswa koMphakathi.
Kwakhishwa u-20% wezindleko zomuntu siqu kuDlamini kulesi sicelo yi-Black Sash Trust ne-Freedom Under Law.
Ummeli wakhe uTim Phahlane utshele abezindaba ngaphandle kwenkantolo ukuthi uDlamini ufuna leli cala liphothulwe ngokushesha. Impela, uDlamini angeke afune ukuthi ingqungquthela yokukhetha ubuholi be-ANC ifike ngenkathi esenecala alisalindile enkantolo.
UDlamini akatholakalanga ukuba aphawule.
Okhulumela i-ANC uPule Mabe uthe iqembu lizovumela umthetho ukuthi wenze umsebenzi wawo.