UDjokovic ubhebhethekisa umbango kwezombusazwe

Lubhalwe nguRazeen Gutta

Umlayezo kaNovak Djokovic we-French Open mayelana ne-Kosovo ne-Serbia ngoMsombuluko uthathwe “njengongafanele” uNgqongqoshe wezemidlalo wase-France.

Ngemuva kokuwina kwakhe ehlula u-Aleksandar Kovacevic (36) wase-Serbia usayine kwikhamera umlayezo olandelayo: “I-Kosovo iyisizinda sase-Serbia. Yekani ubudlova.”

UDjokovic ube esefaka isithombe esifanayo ezinkundleni zakhe zokuxhumana.

I-Kosovo yamemezela inkululeko eminyakeni engu-15 edlule kodwa i-Serbia isayithatha njengengxenye ye-Serbia.

Lo mlayezo ulandelwe ingxoxo ngalolu daba esithangamini sakhe nabezindaba lapho avume khona ukuthi lesi sihloko sibucayi nokuthi akumele sidingidwe.

“Lokhu okuncane kakhulu ebengingakwenza. Ngizizwa nginomthwalo omkhulu njengomuntu owaziwayo – kungakhathaliseki ukuthi yimuphi umkhakha – ofuna ukuweseka,” esho.

“Angiyena usopolitiki futhi anginayo inhloso yokungena kwinkulumompikiswano yezepolitiki. Leso sihloko sibucayi kakhulu. Njengomuntu wase-Serbia konke okwenzeka e-Kosovo kungiphatha kabi kakhulu.”

UNgqongqoshe wezemidlalo e-France, u-Amelie Oudea-Casterautshele utshele i-France 2 ukuthi lo mlayezo ubunepolitiki kakhulu.

“Uma wenza imilayezo emayelana nokuvikela amalungelo abantu imilayezo ehlanganisa abantu ezintweni ezithinta umhlaba wonke umdlali ukhululekile ukwenza lokho,” esho.

“Kodwa kulokhu bekuwumlayezo onobushoshovu kakhulu nepolitiki. Akumele uzibandakanye ikakhulukazi ezimweni ezikhona futhi akumele kuphinde kwenzeke.”

I-Kosovo Tennis Federation nayo ithe lesi sihlabani esibekwe endaweni yesithathu emhlabeni yisona esinomthelela ekunyukeni kwezingxabano phakathi kwala mazwe amabili.

“Ngaphandle komlayezo ojwayelekile omelene nodlame isitatimende esithi ‘i-Kosovo iyisizinda ye-Serbia’ kanye nezinye izitatimende zangemuva komdlalo ezenziwe umuntu onjalo emphakathini ngesikhathi somqhudelwano womhlaba ofana ne-French Open ziholela ngqo ekukhuliseni izinga lokungezwani phakathi kwala mazwe amabili i-Serbia ne-Kosovo,” kusho isitatimende.

“I-Tennis Federation of Kosovo iyaqhubeka nokunxusa ngokuqinile abasubathi nabadlali ukuthi basebenzele ukuthula baphinde bagweme ukusebenzisa kabi izikhundla zabo kwezemidlalo ngezinhloso zezepolitiki.”

UDjokovic uzobhekana noMárton Fucsovics wase-Hungary emzuliswaneni wesibili walo mqhudelwano.

Esithombeni esingenhla: UNovak Djokovic

Umthombo wesithombe: @samstreetwrites

Izihloko zakamuva