Sizwe Sibiya
Izithandani ezidumile zakuleli – uDJ Zinhle noBongani Mohosana weqembu lomculo i-Black Motion – bamemezele ukuthi balindele ingane yabo yokuqala.
UDJ Zinhle ongumculi wengoma ethi-“My Name Is” ukhulelwe ingane yakhe yesibili.
Lesi sihlabani esizinze e-Dannhauser besisanda kumemezela umkhiqizo waso omusha wezinwele zokufakelwa, i-My Name Is – oqanjwe ngengoma ayikhiphe noBusiswa ngowezi-2012.
Akamemezelanga kuphela indaba eyodwa, kodwa ezimbili ezijabulisayo kubalandeli bakhe. Eyokuqala kube ukumenyezelwa kokukhulelwa kwakhe nomlingani wakhe omusha uBongani Mohosana, onguDJ nophrojusa womculo.
UBongani waziwa endimeni yezikaqedisizungu njengoMurdah Bongz oqhamuka eqenjini lomculo we-house i-Black Motion.
Ubaba oneminyaka engama-33 waseGoli uhola umsebenzi ophumelelayo wokuba nguDJ kanye nomlingani wakhe umshayi wezinsimbi uThabo “Smol” Mabogwane.
“Ngiyabonga ngothando kanye nezibusiso zenu. Mina noBongani sijabule kakhulu. UNkulunkulu anibusise nonke. Angikwazi ukuphuza noma iyiphi i-@BoulevardRose njengamanje,” kubhala uDJ Zinhle esihlokweni sesithombe sakhe ebambe isisu esibonakalayo ukuthi ukhulelwe.
Ngemuva kwalokho wehlise ibhomu lesibili:
“Ngivumeleni ngethule uhlelo lwami oluzoba ku-@BET_Africa channel 129 kulo Mandulo!” kubhale uZinhle ku-Twitter.
“Ngiyazi ukuthi lokhu akulindelekile kodwa ngijabule kakhulu ukuhlanganyela le ngxenye yempilo yami nani nonke!” kusho uDJ Zinhle, ngaphambi kokuthi i-BET Africa yenze lesi simemezelo ngokusemthethweni ngemuva kwehora ngoMsombuluko.
Uhlelo olusha lwakumabonakude lukaDJ Zinhle, olubizwa ngokuthi ‘Unexpected’, lulindeleke ukuthi ludlale ngomhla ziyi-18 kuMandulo ngo-19: 30.