Sizwe Sibiya
Udedelwe ngoshwele owabulala isithandwa sakhe esasingumrepha owayedumile kuleli.
Ngemuva kokudonsa iminyaka eyisikhombisa ejele, uSindisiwe Manqele udedelwe ngoshwele ngemuva kokutholwa enecala lokubulala isoka lakhe, umrepha ongasekho uFlabba.
Ngo-2015, uManqele wagwetshwa iminyaka engu-12 ngokugwaza abulale uFlabba.
UNkululeko “Flabba” Habedi wayeyilungu leqembu elahlomula ngendondo ye-hip hop i-Skwatta Kamp. Washonela emzini wakhe e-Alexandra, eGoli, ngenxa yenxeba lokugwazwa ekuseni mhla ziyisishiyagalolunye kuMbasa ngo-2015, ngemuva kokuxabana noManqele.
Esitatimendeni esikhishwe ngoLwesibili, uMnyango wezokuHlunyeleliswa kweziMilo ukuqinisekisile ukukhululwa kukaManqele, kusukela ngomhlaka-24 kuNhlaba.
Ibhodi likashwele liphinde laveza ukuthi uManqele “uyazisola” futhi uyalivuma icala alenza.
“Kubalulekile ukugqamisa ukuthi ukukhishwa ngoshwele akukhona ukuphela kwesigwebo njengoba uManqele ezoqedela isigwebo esisele ohlelweni lokuqondiswa kwezigwegwe emphakathini,” kwengeza isitatimende.
UManqele uzoqeda isigwebo sakhe ngokugcwele ngomhlaka-23 kuNhlaba ngo-2028.