UCassper Nyovest uzithengele isipho esiyinqayezivele

Sizwe Sibiya

Abanye abaculi bamatasa bazithengela izimoto zikanokusho, uCassper Nyovest yena uzithengele iwashi likaFranck Muller.

UNyovest uthenge leli washi elibizayo ngoLwesibili, ngemuva kwesonto eqokwe njenge-Artist of the decade emiklomelweni yeshumi yaseNingizimu Afrika ye-Hip Hop.

Ungaze ufunge ukuthi iwashi belingabizi ngokwanele, njengoba lo mculi etshele i-Diamond Channel ukuthi ilenze ngendlela ayifisayo, ngokuthi bengeza amadayimane azungeze ubuso bewashi.

Ngesikhathi abalandeli becabanga ukuthi useqedile, uthole imoto entsha sha yakwa-McLaren njengesipho sosuku lwakhe lokuzalwa esivela kubalingani bakhe bezingubo, i-Drip footwear, ngoLwesithathu.

“I-Drip/Root yodumo inginike isipho. UNKULUNKULU UTHEMBEKILE!!!” kubhala uNyovest kwingosi yakhe yezokuxhumana ekhombisa imoto yakhe entsha yakanokusho.

UNyovest uselungele ukwethula utshwala bakhe obubizwa nge-“Billiato” ngoLwesine, okuwusuku lwakhe lokuzalwa lapho azobe ehlanganisa khona iminyaka engu-31.

UNyovest, ogama lakhe langempela nguRefiloe Maele Phoolo, okwamanje ulungiselela umdlalo wobungani wesibhakela nomhlaziyi wezokuzijabulisa ku-YouTube, uSlik Talk.

UNyovest uthe kuyadabukisa ukuthi kufanele aqale umsebenzi wakhe wesibhakela nomuntu osebenzisa i-YouTube, kodwa uSlik Talk uyena kuphela ” onesibindi ozokwazi ukumelana naye.

Umdlalo phakathi kwala baculi ababili uzosakazwa bukhoma ku-YouTube ngomhlaka-22 kuZibandlela.

“Ngiyamhlonipha ngokuvuma impi, kodwa ngizomenzela ezibukwayo,” kusho uNyovest.

Izihloko zakamuva