Celani Sikhakhane
Empini yakhe yokuvimba ukugcotshwa kweSilo uMisuzulu kaZwelithini, ubabomncane wakhe uMntwana uMbonisi KaBhekuzulu usole uMntwana uMangosuthu Buthelezi “ngokusebenzisa kabi” igama lobukhosi bakaZulu ukuze athuthukise ipolitiki.
UMntwana uMbonisi ongumfowabo weSilo esakhothama uZwelithini usefake isicelo esiphuthumayo sokuvimba ukugcotshwa kukaMisuzulu njengeSilo samaZulu eNkantolo eNkulu yasePitoli.
Abalindeleke ukuthi baphendule uMengameli uCyril Ramaphosa, uNdunankulu waKwaZulu-Natal uMnu Sihle Zikalala, iKomidi lokuLawulwa kweSilo uMisuzulu, bonke oNdlunkulu beSilo esakhothama noMntwana wakwaPhindangene. Banikezwe kuze kube uLwesine oluzayo ukuthi baphendule.
UMntwana uMbonisi uthe akukhona okokuqala uButhelezi esebenzisa budedengu igama lasebukhosini ngezinhloso zakhe zepolitiki. Uthe lokhu ubekwenza nangesikhathi kusabusa iSilo esakhothama uZwelithini KaBhekuzulu.
“Uhlelo olunobulungiswa lokuhlonza nokukhetha indlalifa yesihlalo sobukhosi bakaZulu lwadunwa inkosi uMangosuthu Buthelezi, ohlose ukuthuthukisa ipolitiki yakhe,” kubhala uMntwana uMbonisi esicelweni sakhe.
UMntwana uMbonisi ubalule ukuvela kukaMntwana wakwaPhindangene muva nje esigxotsheni sokhetho se-IFP njengobufakazi balokhu.
Uphinde wasola uMntwana wakwaPhindangene ngokudukisa iSilo uMisuzulu ngokumtshela ukuthi nguye okufanele athathe isihlalo sobukhosi bakaZulu.
Lo babomncane oyivukelambuso uyasho emaphepheni akhe asenkantolo ukuthi uButhelezi, osenguNdunankulu wobukhosi bakaZulu, akalona ngisho ilungu eliphezulu lobukhosi bakaZulu.
Lesi sicelo sifakwe i-Mabuza Attorneys ukuze basize uMntwana uMbonisi ukuthi avimbele ukugcotshwa okuzayo okuhlelwe ukuthi kwenzeke KwaNongoma.
Impi yokulwela isihlalo sobukhosi bakaZulu yaqala ngemuva nje kokuthi kutshalwe iSilo uZwelithini emalibeni asesigodlweni sakwaDlamahlahla KwaNongoma nyakenye.
Lo mbango lokhu waqala kusukela lapho kanti umndeni wasebukhosini ubulokhu ungena uphuma enkantolo enkulu ubanga okufanele aqokwe esihlalweni sobukhosi, esinesabelomali sonyaka esingaphezu kuka-R65 million.