Menzi Magubane
Sesifikile isikhathi sokuthi umqeqeshi weBafana Bafana uHugo Broos nethimba lakhe bakhombise ukuthi bahlanganiseni njengoba bebheke kwi-Africa Cup of Nations (i-Afcon) yonyaka ka-2023.
Abalandeli abakulindele ukubhekana nokunye ukuhluleka kwemidlalo yokuhlunga, ngemuva kokuthi iBafana iphuthelwe i-Afcon yokugcina ebise-Cameroon ngoMasingana.
Abalandeli beBafana bakwazile ukuxolela uBroos nabadlali bakhe ngesikhathi bengakwazanga ukungenela iNdebe Yomhlaba ye-FIFA ka-2022.
Bakuqonda kahle ukuthi ukuhlulwa i-Ghana ekuhambeni bekuyiphatha kabi iBafana njengoba unompempe uMaguette N’diaye ebonakala evuna ama-Black Stars.
Kulokhu izinto zingase zibe zimbi kumqeqeshi wase-Belgium neqembu lakhe uma bephinda behluleka.
Abazi ibhola eNingizimu Afrika abamuboni uBroos elahlekelwa umsebenzi uma engaphumeleli ukuhola iBafana kwi-Afcon e-Ivory Coast ngonyaka ozayo. Kodwa abalandeli bazomuzonda uma iqembu lingaphumeleli ukungena.
Ngesikhathi uBroos ethatha izintambo kuMolefi Ntseki owaphelelwa umsebenzi ngenxa yokuhluleka ukuhola iBafana kwi-Afcon yase-Cameroon umsebenzi wakhe kwi-SA Football Association bekuwukwakha kabusha iqembu nokwenza isiqiniseko sokuthi liyangena ku-Afcon ka-2023 neNdebe yoMhlaba ka-2026.
Kodwa ngabe i-Safa izomxolela uBroos uma engawufezi umsebenzi wakhe?
NgoMsombuluko lo mqeqeshi umemezele isikwati sabadlali abangu-37 esizodlala emidlalweni yokuhlunga.
NgoLwesithathu oluzayo uzosinciphisa sibe ngabadlali abangu-23 azoya nabo e-Morocco emdlalweni wokuqala wokuhlunga ozoba ngasekupheleni kwale nyanga.
Ngemuva komdlalo we-Morocco iBafana izokwamukela i-Zimbabwe ngemuva kwalokho ibhekane ne-Liberia. Lo mqeqeshi wase-Belgium ubona i-Morocco njengeqembu elizomnika inselelo enkulu kanti laba abanye ababili angeke bamnike inkinga.
Kodwa ebholeni kungenzeka noma yini futhi awekho ngempela amaqembu amancane.
Ngakho uBroos kuzomele awaxwaye wonke amaqembu azobhekana nawo. Isithunzi sakhe sisengcupheni futhi abalandeli bakhe ngeke bajabule ngaye uma ehlulwa i-Liberia ne-Zimbabwe.
Umthombo wesithombe:@SportsBrief
.
