Razeen Gutta
Impela unyaka omusha usuqalile, futhi yonke imisebenzi evamile isaqhubeka njengoba uBrock Lesnar ephinde wawina isicoco se-WWE.
Kube noshintsho ngomzuzu wokugcina ezinhlelweni zomcimbi we-WWE Day 1 pay-per-view leenze ngemuva kokuthi uRoman Reigns ahlolwe watholakala ene-Covid-19 ngaphambi komdlalo, okuholele ekutheni kufakwe uLesnar ukuba alwele isicoco.
Ekuqaleni uLesnar ubehlelelwe ukuqhudelana noReigns ku-Universal Championship.
Umqhudelwano wabantu abane uguqulwe waba umdlalo wabadlali abahlanu ngemuva kokufakwa kukaLesnar, nowayengumpetha uBig E obeqhudelana noSeth Rollins, uKevin Ownens kanye noBobby Lashley.
Ubuyingqophamlando umqhudelwano we-WWE phakathi kukaLesnar noLashley njengoba abathandi balo mdlalo kuyo yonke indawo bebejabulile ukubona laba ababili bebambene ngezihluthu eringini okokuqala ngqa.
Kulo mqhudelwano impi ivele yaphenduka kwangathi iphakathi kwamadoda amabili.
ULesnar ugcine ekwazile ukunqoba uBig E, osebe ngumpetha walesi sicoco cishe izinyanga ezine ngemuva kokuwina isicoco se-Money in the bank ngoMandulo.
Umqhudelwano we-WWE Championship udale idumela kule nkundla i-State Farm Arena e-Atlanta, nakuba kuyindawo eke yasingatha eminye imidlalo ethokozisayo.
UBeth Phoenix ongumdlali ohamba phambili ubuye ngokuzosiza umyeni wakhe uEdge ukuthi ahlule uThe Miz; ngenkathi umpetha wabesifazane uBecky Lynch egcine isicoco sakhe ngokuhlula uLiv Morgan.
Umqhudelwano olandelayo kuzoba ngowe-Royal Rumble olindelwe ngabomvu ozoba ngomhlaka-29 kuMasingana. Lo mqhudelwano uzoqala indlela eya ku-WrestleMania.