Uboshiwe owesilisa obezenza uNdunankulu wase-UK 

Owesilisa oneminyaka engu-35 ubudala obezenza uBoris Johnson uboshwe ngemuva kokushayisa imoto yakhe esigxotsheni.

Owesilisa wase-Zuidhorn entshonalanga ye-Groningen e-Netherlands, uboshwe amaphoyisa ngemuva kokuthola imoto yakhe ishiyiwe. Utholwe egqoke njengoNdunankulu wase-UK, uBoris Johnson.

Ngeshwa amaphoyisa ase-Nerthelands awazange adidiswe ilokhu kulingisa kwakhe njengoba kutholwe ilayisense yokushayela yase-Ukraine engelona iqiniso enesithombe sikaBoris Johnson nosuku lwakhe lokuzalwa olufanele.

Ilayisensi etholakale ngaphakathi emotweni ibhalwe ukuthi izogcina ukusebenza ngoZibandlela ngo-3000.

“Lo wesilisa akakwazanga ukuzichaza ukuthi ungubani futhi wenqabile ukuyohlolwa inani latshwala elisemzimbeni wakhe,” kusho okhulumela amaphoyisa etshela abezindaba ze-AFP.

Ku-Instagram, amaphoyisa abhale ukuthi “Ngeshwa umsolwa simubambe oqotsheni.”

Akukacaci ukuthi lo wesilisa ozenza uBoris uphethe ubuzwe base-Ukraine yini, kodwa owayeyintatheli yase-Russia esebenzela umsakazo womphakathi wase-Nerthelands i-NOS uthe amalayisense mbumbulu angathengwa ezitolo zezivakashi e-Ukraine.

“Ngike ngayibona enegama likaShansela wase-Germany u-Angela Merkel kanye noMengameli wase-Ukraine uVolodymyr Zelensky kanye nawabanye,” kusho uKysia Hekster ku-Twitter.

Umsolwa uboshelwe ukushayela ephuzile nokuzenza umuntu ngeyena. Isiphetho sakhe manje sisezandleni zohlelo lwezobulungiswa lwase-Nertherlands.

Luhlanganiswe intatheli yakwa-Scrolla

Isithombe esingenhla: UBoris mbumbulu

Umthombo wesithombe: I-Twitter

Izihloko zakamuva