Doreen Mokgolo
Umama wezingane ezimbili kusolwa ukuthi uphakele yena nezingane zakhe ukudla okufakwe ushevu wamagundane waqede wazithatha wahamba nazo.
NgoMsombuluko ngemuva kwalesi sidlo umama oneminyaka engu-37 ubudala wase-Dunnotter e-EKurhuleni kusolwa ukuthi unqume ukuthatha uhambo olude nezingane zakhe oluya e-Springs elibangise e-Free State nomndeni nabangani bakhe.
Ngesikhathi behamba ngemoto e-Frankfort okuyibanga elingu-120km ukusuka ekhaya izingane ziqale ukukhala ngesisu esilumayo ngemuva kwalokho umama wama egaraji wacela abasebenza ngophethiloli ukuthi babize isithuthi seziguli njengoba izingane zakhe bezigula.
Umfana wakhe wokuqala obeneminyaka engu-16 obenza ibanga lesikhombisa esikoleni samabanga aphezulu e-Springs Boys ushonele esibhedlela ngosuku lwesigameko. Udadewabo oneminyaka eyisikhombisa ulwela impilo yakhe esibhedlela.
Umama naye uthole usizo lwezempilo wabuye wadedelwa, kodwa waboshwa ngamaphoyisa akwa-Mafube.
Umthombo osondelene nomsolwa, ongathandanga ukudalulwa igama usitshele ukuthi baqale ukukhathazeka ngoLwesithathu ngesikhathi isikole sezingane sibika ukuthi izingane ezimbili azifikanga esikoleni.
“Ngemuva kwalokho sathola ucingo luvela emaphoyiseni ase-Frankfort esitshela ngokuboshwa kukanina nesimo sezingane.”
“Asazi ukuthi yini imbangela emholele ekutheni enze into eshaqisa kangaka. Ubengumuntu othanda ukuthula futhi ubengabikeli muntu izinkinga zakhe.”
Umama udluliselwe esiteshini samaphoyisa e-Dunnottor wabekwa icala lokubulala nelokuzama ukubulala ngokusemthethweni.
Okhulumela amaphoyisa ase-Gauteng uColonel Nthabiseng Sello ukuqinisekisile ukuthi baphenya icala lokubulala nelokuzama ukubulala.
“Umama uvele kafushane eNkantolo yeMantshi yase-Nigel.
“Kumanje uzogqunywa esitokisini kuze kube umhlaka-13 kuNhlangulana lapho ezovela khona ezofaka isicelo sebheyili,” usho kanje.
Emasontweni amathathu edlule cishe izingane eziyishumi eNingizimu Afrika zibulewe ngokudliswa ushevu.