Lubhalwe nguDylan Bettencourt
Umhleli wezemidlalo
Umpetha womhlaba we-Fomula 1 osewine amahlandla amabili uMax Verstappen ubelokhu ebonakala engakhathazekile kodwa uqale ukubonakala kwi-Azerbaijan Grand Prix.
Esikhathini esiningi sesizini abahlaziyi bebencoma uVerstappen ngokukhululeka ngendlela engavamile kodwa mhlawumbe ubezibambile sonke lesi sikhathi.
Ukungqubuzana kwakhe nomshayeli we-Mercedes uGeorge Russel ngoMgqibelo kubonakale kuyinto ewokhela uthuthuva.
Ngesikhathi uRussell eshayela imoto yakhe yohlobo lwe-Mercedes F1 uye wabheka phezulu ngaphakathi emotweni kaVerstappen futhi wathinta le moto yeqembu le-Red Bull wakhungathekisa uVerstappen.
Bekuyinto ecikayo kangangokuthi yena nethimba lakhe abakwazanga ukuyiyeka.
Ngesikhathi uVerstappen enikezwa ithuba lokudlula uRussell wenze lokho ngaphandle kokuthinta uRussell – futhi wenza isiqiniseko sokuthi lokho kuyabonakala.
Ithimba lakhe lonjiniyela nalo belijabule kakhulu ngokuthi ukwazile ukudlula uRussell ngaphandle kokumthinta.
Khumbula ukuthi uVerstappen ungumshayeli osezenzele igama ngokuba nolaka futhi uvame ukuzithola ethinta enye imoto.
Uzakhele udumo ngokuba “umshayeli ongcolile” kodwa kuke kwacaca emijahweni yakhe ukuthi nakuba ekwazi ukushayelisa abanye kabi uyehluleka ukukumela lokho mase kwenziwa kuye.
Ngemuva komjaho uVerstappen ubone kufanele ukuthi aye kuRussell ambuze ukuthi kungani emthintile.
URussell uchaze ukuthi ubevalelekile nokuthi ubenamasondo abandayo kanti uVerstappen uphendule ngokuthi bonke bebevalelekile. Ube esebiza uRussell “nge-dickhead” ngesikhathi ehamba esuka eduze kwakhe.
Impela isimo besishubile.
Okunye okuphazamise ukuzethemba kukaVerstappen ukuthi uzakwabo uSergio Perez uwine imijaho emibili owe-Sprint ngoMgqibelo kanye nomjaho omkhulu ngeSonto.
Manje uPerez usele ngamaphuzu ayisikhombisa kuphela ngemuva komshayeli waseDashi njengoba amaqembu ezolibhekisa eMelika emqhudelwaneni we-Miami Grand Prix.
I-Red Bull iyazi ukuthi kufanele igcine uVerstappen ejabule futhi ngeshwa kubo lokho kumphendule umuntu ongathandeki kunalokhu ayeyikho ngesikhathi engawini.
Esithombeni esingenhla: UMax Verstappen
Umthombo wesithombe: Twitter