Menzi Magubane
U-Arthur Zwane noDillon Sheppard basazobamba izintambo uma iKaizer Chiefs isibhekene neWydad Casablanca emdlalweni wokuqala we-CAF Champions League.
Umdlalo uhlelelwe uMgqibelo e-Stade Mohammed V e-Morocco ngehora le-9 ebusuku.
UZwane noSheppard bebephethe imidlalo emibili edlule yaMakhosi ye-DStv Premiership kulandela ukuxoshwa kukaGavin Hunt. Banqobe yomibili imidlalo, basiza iqembu ukuthi liqede kwabayisishiyagalombili abaphezulu.
UStuart Baxter waseBrithani, waqokwa njengomqeqeshi omkhulu waMakhosi esontweni eledlule ngemuva kokuthi leli qembu lixoshe uHunt.
Isitatimende sichaze ukuthi ukuqokwa kukaBaxter bekufanele kuhlehliswe ngenkathi abaphathi beqembu besebenza ukuze baqedele imvume yakhe yokusebenza.
UBaxter uphinde wajoyina iziqhwaga zase-Soweto ngesonto eledlule kanti uma esethole imvume yakhe yokusebenza uzosizwa nguZwane noSheppard.
“Umqeqeshi uBaxter uzohamba neqembu baye ezweni laseNyakatho ne-Afrika, njengoba iqembu lilungela umdlalo obaluleke kakhulu owandulela owamanqamu lapho lizodlala khona nabanqobe amahlandla amabili i-CAF Champions League.”
IChiefs ithole isibhaxu sika 4-0 emdlalweni wokuqala wamaqoqo ibhekene neWydad AC ngoNhlolanja. IChiefs nokho, ikwazile ukuthola ama-Moroccans emdlalweni wesibili e-Soweto ngoMbasa. Amakhosi awunqobe lowo mdlalo ngo 1-0 nokugcine ngokuthi adlulele esigabeni sama-knockout.
UZwane noSheppard bazi kahle kamhlophe ukuthi yini ebalindile e-Morocco.
Impumelelo yeChiefs kulo mqhudelwano ngeke ibungazwe yiwo wonke umuntu. Uma bekwazi ukunqoba, amaqembu afana naMaZulu ne-Orlando Pirates ngeke ajabule nakancane.
Ukunqoba kweChiefs kulo mqhudelwano kuzokwenza Usuthu lukhishwe ku-Confederation Cup kanye namaBhakabhaka nawo akhishwe, njengoba ukuwina lo mncintiswano kuqinisekisa indawo yeqembu kule sizini elandelayo.
Umthombo wesithombe: @kaizerchiefs