Dylan Bettencourt
Ubaba kaBryan Habana odumile ebholeni lombhoxo nowayedlalela amaBhokobhoko uboshelwe ukukhwabanisa ngoMsombuluko ngamacala asukela eminyakeni emihlanu edlule.
UBernard Habana ubegcinwe esiteshini samaphoyisa e-Linden eGoli ngaphambi kokuvela eNkantolo yeMantshi yase-Randburg. Amaphoyisa endawo ebelokhu ephenya leli cala kusukela ngo-2017 eliye lahlehliswa wathola ibheyili ka-R1 000.
Ngokusho kwe-News24, imibiko iveza ukuthi uBernard wabanjwa ngemuva kophenyo olwathola ukuthi uzenza i-ejenti yenkampani yezokuvakasha.
Okhulumela amaphoyisa uDimakatso Sello ukuqinisekisile wathi “Umsolwa uboshwe ngomhlaka-30 kuNhlaba, ube esevela eNkantolo yeMantshi yase-Randburg.”
Elinye iphoyisa liveze ukuthi izisulu eziningi zokukhwabaniswa kwezindawo zokuvakasha zizovela njengofakazi bombuso ecaleni, iphoyisa litshele i-CityPress.
Icala lavulwa okokuqala ngoMbasa ngo-2015.
Isisulu esakhwabaniswa nguBernard ngencwadi yokuvakasha sivule icala esiteshini samaphoyisa e-Linden ngemuva kokuthi sikhokhe imali engu-R12 000 kwi-akhawunti yomsolwa nentombi yakhe, uMbali Mtetwa.
Ubaba kaHabana wake waba sohlangothini olubi lomthetho phambilini, ngo-2018 wasolwa ngokuqola usomabhizinisi wase-Angola imali engu-R1 million.
Waboshwa ngawo lowo nyaka ngokuhluleka ukukhokha isikweletu sakhe ehhotela eGoli.
Ubudlelwano phakathi kukaBryan Habana noyise babhekana nobunzima ngo-2010 ngesikhathi uBernard exoshwa esikhundleni sakhe njengomphathi kaBryan ngemuva kokutholakala ukuthi ubentshontshela lo mdlali.
Lo owayengumdlali wamaBhokobhoko washiya umsebenzi wakhe wokudlala ibhola lombhoxo ngo-Mbasa ngo-2018 ngemuva kokudlala imidlalo engaphezu kweyikhulu eqenjini elikhulu, okuhlanganisa nokuba seqenjini lamaBhokobhoko elanqoba iNdebe yoMhlaba ngo-2007.
Umthombo wesithombe: @Citypress