Lubhalwe nguLinda Ximba
Ubaba nendodana, uBongani “Wonderboy” Mahlangu (42) noBheki Mahlangu (24), bazoqopha umlando njengoba bobabili bezolwa kwizimpi zesibhakela ngoLwesihlanu ebusuku.
Umshayisibhakela oneminyaka engu-40 we-junior featherweight nguyena umpetha wakuleli omdala kunabo bonke. Uzobe evikela isicoco sakhe sokuqala kuMduduzi Mzimela waKwaZulu-Natal.
UMzimela unqobe isicoco saseKZN ngamaphuzu ehlula uSanele Maduna ngoLwezi eThekwini.
UMahlangu junior uzobhekana no-Ontiretse Seleke empini enemizuliswano eyisishiyagalombili ye-featherweight.
“Angikaze ngicabange ukuvela kumdlalo wesibhakela ofanayo nendodana yami,” kusho uWonderboy.
“Kusukela esemncane wayesithanda isibhakela, ekhala efuna uyangilandela uma ngiya ejimini. Ngijabule ngenqubekela phambili yakhe kuze kube imanje. Kuzobe kuwumdlalo okhethekile kithi. Ngibonga uphromotha ngokwenza lokhu kwenzeke.”
UWonderboy ngeke abukele phansi imbangi yakhe.
Uhlomule ibhande le-IBF Africa kuNtulikazi nyakenye ngemuva kokuketula u-Ayanda Sonjica phambi kwezihlwele ebezigcwele phama e-East London.
UBheki wahlulwa nguJeff Magagane.
Uphromotha uJoyce Kungwane, we-TLP Promotions ujabulile ngokuqopha umlando.
“Ukulwa kukababa nendodana ekhadini elilodwa akukaze kubonakale eringini uma ngilhumbula kahle,” kusho uKungwane.
“Kuzoba kuwusuku olukhulu kwabakwaMahlangu. Kuyangijabulisa ukuthi nginguphromotha wokuqala ukuthi lo mqhudelwano ukhonjiswe bukhoma ngenxa yesivumelwano sokusebenzisana ne-SABC ne-BSA.”
Osesithombeni esingenhla: UBongani Mahlangu
Umthombo wesithombe: I-Facebook