Lungani Zungu
Umkhankaso kaDuduzane Zuma wokufuna ukuvelela futhi abe nomfutho wokuba nguMengameli olandelayo we-ANC usuqalile ukuba nomthelela emsebenzini wezepolitiki ka-Ace Magashule.
Abaxhasi bezepolitiki kubikwa ukuthi bakhethe ukuxhasa umkhankaso kaDuduzane ngemali esikhundleni sokusiza uNobhala-Jikelele we-ANC omisiwe ngezikweletu zakhe ezinyukayo zokukhokhela abammeli.
UMagashule, okulindeleke ukuthi aye eNkantolo eNkulu yokuDluliswa kwamaCala, usathuthumela ngokushaywa umthetho ngesonto eledlule, okhiphe isinqumo sokuthi ukumiswa kwakhe ku-ANC kuhambisana nomthethosisekelo futhi kuvumelekile.
Manje uzungeza nesitsha sokucela abalingani bakhe ukuthi bamxhase ukukhokhela izikweletu zakhe zomthetho eziqhubekayo.
“La macala amshiye engena lutho. Futhi udonsa kanzima manje ukukhokha izikweletu zabeluleki abaphezulu kanye nabancane,” kusho omunye wabasekeli bakhe abathembekile e-Free State, ongathandanga kudalulwe igama lakhe.
Ngaphandle kwecala lakhe lokumiswa, uMagashule naye ulwela ukugeza igama lakhe kwithenda yezigidi ezingama-R255, eyakhishwa ngesikhathi esanguNdunankulu wase-Free State.
UMagashule usathola umholo wakhe ku-ANC wemali eyizi-R133,000 wanyanga zonke, yize emisiwe.
“Umholo wakhe awanele ukumsiza ukuthi angaphumi ejele. Usesimweni esinzima. Abaxhasi abaningi babheke ngasohlangothini lukaDuduzane Zuma njengoba ekhankasa kanzima,” kusho umsekeli.
Njengengxenye yomkhankaso wakhe ngaphambi kwengqungquthela yokukhetha ubuholi be-ANC ngonyaka ozayo, uDuduzane wethule isigaba esinobuhlakani esikoleni samabanga aphansi iGobhela e-Hibberdene, eningizimu yeKZN.
UMagashule manje kulindeleke ukuthi alandele indlela efanayo yomngani wakhe, owayenguMengameli wezwe uJacob Zuma, bese elwela ukuba nguMengameli we-ANC.
Udinga nje ukuthi akhokhe izikweletu zakhe zomthetho kuqala.
Ngesonto eledlule, amajaji uJody Kollapen, uSharise Weiner kanye no-Edwin Molahleli basichithile isicelo sikaMagashule sokuthi ukumiswa kubekelwe eceleni nezindleko.
UMagashule umiswe ngoNhlaba ngokuhambisana nenqubo yeqembu yokubeka eceleni amalungu abhekene namacala enkohlakalo.
Ngesikhathi ethintwa, uMagashule uvele wahleka wavala ucingo, ngenkathi ucingo lukaDuduzane lungena ku-voicemail.