Sizwe Sibiya
NgoLwesithathu ekuseni imboni yezokungcebeleka eMzansi ivuke ngezindaba zokuthi osaziwayo ababili abahlonishwayo kwezokungcebeleka baxoshiwe emsebenzini.
Umculi ophinde abe yijaji lama-Idols SA, u-Unathi Nkayi, uhoxisiwe njengomethuli wohlelo ngabaphathi be-Kaya 959 njengomsakazi wabo, ngenxa yokungamethembi kanti baxoshe lo methuli ohlelweni lwakhe olubizwa nge-Midday Joy.
“I-Kaya 959 ingakuqinisekisa ukuthi kukhona izigameko ezenzekile eziholele ekubhidlikeni kobudlelwano bokuthembana phakathi kwalezi zinhlangothi zombili,” kusho i-Kaya 959 esitatimendeni esikhishwe ku-website yabo.
“Kuzomenyezelwa ozongena esikhundleni sakhe ngokuhamba kwesikhathi,” kuphetha lo msakazo ozinze eGoli.
Khonamanjalo, umlingisi uSthembiso SK Khoza owazakhela udumo edlala indawo kaShaka Khoza emdlalweni wakumabonakude i-The Queen, odlala esiteshini esikhonjiswa ku-DStv uMzansi Magic kubikwa ukuthi uxoshwe i-Ferguson Films edidiyela umdlalo oyintandokazi kamabonakude.
Lokhu kuza ngemuva kokuthi uKhoza ophila impilo ebabazekayo osekukaningi ephumela obala ezinkundleni zokuxhumana esolwa ngokushaya.
“Isinqumo sithathwe ngokuyalelwa ngabakwa-Multichoice kulandela izinsolo zokushaya ezibikwe mayelana nalo mlingisi,” kubika uPhil Mphela okhiphe lezi zindaba ku-Twitter.
Umthombo wesithombe: Kaya 959