Lubhalwe nguRazeen Gutta
UGareth Southgate wesulile njengomqeqeshi we-England ngemuva kweminyaka eyisishiyagalombili, kulandela ukuhlulwa kweqembu ngo 2-1 yi-Spain kowamanqamu we-European Championships e-Berlin.
“Sekuyisikhathi soshintsho nesahluko esisha,” kusho uSouthgate.
Ube ngumqeqeshi we-England kusukela ngo-2016 ngemuva kokushiya kukaSam Allardyce.
U-Southgate wenza kahle kakhulu ngokukhulu ukushesha, eholela i-England kuma-semi-final ayo okuqala eNdebe yoMhlaba eminyakeni engu-28 ngo-2018 kanye nowamanqamu wabo wokuqala omkhulu wabesilisa eminyakeni engu-55 ku-Euro 2020.
Kulo nyaka, bafinyelele kowamanqamu okokuqala emazweni angaphandle.
U-Southgate oneminyaka engu-53 ubudala ukholelwa ukuthi iqembu elincane linekusasa eliqhakazile.
“Iqembu esaliyisa e-Germany ligcwele abadlali abasebancane abanethalente elithokozisayo, futhi bangayiwina indebe sonke esiphupha ngayo,” usho kanje.
Ubonge abasebenzi nabalandeli bakhe abamesekayo: “Sinabalandeli abahamba phambili emhlabeni jikelele futhi ukwesekwa yibo kusho lukhulu kimi.
“Ngingumlandeli we-England, futhi ngiyohlala njalo nginguye.”
Esithombeni ngenhla: UGareth Southgate.
Umthombo wesithombe: @england