U-Miss SA omusha uthweswe umqhele

Emasontweni ayishumi edlule, abantu baseMzansi bakhethe uShudufhadzo Musida njengentandokazi yabo ukunqoba umncintiswano ka-Miss South Africa.

Izolo ebusuku, ube esewina umncintiswano.

Mhla zinhlanu kuNcwaba, uShudufhadzo oneminyaka engama-24 wathumela futhi wabhala i-tweet ku-akhawunti yakhe ye-Twitter [email protected], ebonga isizwe ngokumvotela:

“Ngijabule kakhulu ukunazisa ukuthi,ngiphumelele ekungeneni kowamanqamu ka-Miss SA kwabayi-10. Ngithole ukuthi, yimi owine ivoti lomphakathi. Ngibusisiwe kakhulu futhi ngibonga ngakho konke ukwesekwa.

Lolu hambo lube luhle futhi kuthathe isigodi sonke ukufika lapha, ngakho-ke ngiyabonga ngokuba yisigodi sami!”

Le ntombazane yase-Ha-Masia e-Limpopo ithathe isicoco somncintiswano ka-Miss South Africa kowezi-2020.

Eshiya uThato Mosehle endaweni yesibili kwathi uNatasha Joubert waba ngowesithathu.

UShudufhadzo uthweswe umqhele eKapa ngoMgqibelo ehhotela i-The Table Bay.

Njengompetha womncintiswano wonyaka wezi-2020, uzothola umklomelo wezigidi ezi-R3.

Owine u-Miss SA kowezi-2020:

● Uneziqu ze-Bachelor of Social Sciences in Philosophy, Politics and Economics – ayithola eNyuvesi yasePitoli

● Njengamanje wenza iziqu ze-BA Honours in International Relations eNyuvesi yase-Witwatersrand.

Abathathu abahambe phambili kulo mncintiswano, bazomela iNingizimu Afrika emincintiswaneni yamazwe omhlaba okubalwa kuwo u-Miss Universe ohlonishwa kakhulu owanqotshwa nyakenye ngu-Miss SA wonyaka wezi-2019, uZozibini Tunzi.

Isithombe: @Official_MissSA