Lubhalwe nguLungani Zungu
U-Eskom usuqale isigaba sesithupha sokucishwa kukagesi ngoLwesibili ebusuku ngemuva kokuphazamisekakwamayunithi ayisithupha aphehla ugesi ngoMsombuluko.
U-Eskom umemezele ukuthi isigaba sesihlanu sokucishwa kukagesi sizoqala ukusebenza namuhla kuyoze kuphume esinye isaziso.
“Emahoreni angu-24 edlule, amayunithi ayisithupha aphehla ugesi aphazamisekile kanti amayunitha ase-Duvha nase-Hendrina abengakaqali ukusebenza,” kusho okhulumela u-Eskom uSikonathi Mantshantsha.
“Ngaphezu kwalokho iyunithi ephehla ugesi yase-Matla nase-Arnot isiqalile ukusebenza. Kukhona ukubambezeleka ekulungiseni amayunithi endaweni yase-Duvha, i-Kendal, i-Grootvlei nase-Kriel.”
Kulahleke u-4,654 MW ngenxa yokulungiswa obekuhleliwe, kanti ukuhlukaniswa kwamandla okuphehla ugesi kufinyelela ku-18,123MW.
Ngempelasonto isigungi esiphezulu se-ANC (NEC) kwi-Letgotla simemezele ukuthi izwe libhekene nhlekelele kuzwelonke ngokucishwa kukagesi.
Nokho uMengameli Cyril Ramaphosa uthe iqembu elibusayo lisacubungula izidingo zomthetho ukuze kumenyezelwe isimo senhlekelele.
“Umsebenzi usuqalile ngaphakathi kuhulumeni ukuthola ukuthi ziyafezwa yini izidingo zomthetho zesimo sezinhlekelele kuzwelonke nokuthi iziphi izinyathelo ezizonikwa amandla ukuze sizenze,” kusho uRamaphosa ethula inkulumo yakhe yokuvala ngoMsombuluko ebusuku.
Lokhu kufana nesinqumo sikahulumeni sokubeka isimo senhlekelele ngenkathi i-Covid-19 igadla ngo-2020.
Uthe isimo sikazwelonke senhlekelele sizokwazi ukusinika ithuba lokuthola izinsiza ezingadingeka ukubhekana ngokugcwele nenselelo isizwe sethu esasibhekene nayo.”
UNobhala Jikelele we-ANC, uFikile Mbalula ukhulume noRamaphosa ngesikhathi ekhuluma nabezindaba ngoLwesibili.
“Ekuxazululeni inkinga kagesi, isigungu esiphuzulu i-Lekgotla ikhuthaze uMengameli wakuleli ukuthi amemezele isimo senhlekelele kuzwelonke, okuzodinga nokuthi i-ANC iphinde ixhumane nemiphakathi yethu njengoba i-ANC ingenawo amandla anele okuzenzela konke.”