Sizwe Sibiya
I-SABC 1 ikuqinisekise ngempumelelo ukuthi i-Braai Show with Cass izodlala njengoba bekuhleliwe ngoLwesithathu ebusuku, ngemuva kokuveza amanye amazwibela akhethekile esizini yesibili ngoLwesibili.
“Kusele ubusuku obubodwa, ngaphambi kokubona isiqephu sokuqala se-The Braai Show sesizini yesibili, nomethuli omusha sha ongadingi kwethulwa,” kubhale isiteshi ku-Twitter ngosuku olwandulela okumele uhlelo luqale ukukhonjiswa ngalo – ngo-7: 30 ntambama ngoLwesithathu, mhla ziyisishiyagalombili kuMandulo.
Lokhu okubhaliwe bekuxhunye namazwibela alolu chungechunge lwemizuzwana engama-30, okunika abalandeli amazwibela ezivakashi ezizobe zijoyina umethuli omusha uCassper Nyovest.
Lezi kuzoba yizindaba ezingamukeleki kulowo owayengumethuli wohlelo, u-AKA, okubeke kwacaca ezinyangeni ezedlule ukuthi akafuni ukuthi uhlelo luqhubeke ngaphandle kwakhe. Uthe unamalungelo angu-50% alolu hlelo futhi ufune nencwadi esemthethweni yokuthi uhlelo lungaqhubeki.
USomizi Mhlongo nowake waba nguMiss Universe uZozibini Tunzi kubukeka bezoba yizimenywa zokuqala kulolu hlelo.
Bazobe behambisana nomlingisi uPresley Chweneyagae, owayedlala indawo kaDavid emdlalweni owawina i-Oscar i-Tsotsi.
I-SABC 1 nabadidiyeli be-Cake Media baphendule ngokuthi bafuna lo mrepha axolise futhi ahoxise isimangalo sakhe.